समाज

ज्ञानेन्द्र शाहीले भने– अहिलेको नीति कार्यक्रम २०८१ को नीति कार्यक्रमसँग हुबहु

सिधाकुरा

मंगलबार, वैशाख २९, २०८३

ज्ञानेन्द्र शाहीले भने– अहिलेको नीति कार्यक्रम २०८१ को नीति कार्यक्रमसँग हुबहु

काठमाडौँ । राष्ट्रिय प्रजातन्त्र पार्टीका संसदीय दलका नेता ज्ञानेन्द्र शाहीले २०८१ सालको नीति तथा कार्यक्रम र अहिलेको नीति तथा कार्यक्रम हुबहु रहेको दाबी गरे ।

प्रतिनिधिसभाको आजको बैठकमा शाहीले भने– ‘२०८३ सालको नीति तथा कार्यक्रम र २०८१ सालको नीति तथा कार्यक्रम हुबहु छ । २०८१ सालको २१७ बुँदाको छ, यो १०० बुँदाको छ, धेरै बुँदा हुबहु छ ।’

Watch On

शाहीले दुई वर्षअघिको नीति तथा कार्यक्रम लेख्ने मान्छे र अहिलेको नीति तथा कार्यक्रम लेख्ने मान्छे त एउटै रहेको दाबी गरे ।

उनले नीति तथा कार्यक्रमबाट देशले आमुल परिवर्तन चाहे पनि पुरा नभएको दाबी गरे । शाहीले सत्ताको शक्ति अस्थायी हो भन्दै सरकारमा बस्नेले जे पनि गर्न सक्छु भन्ने नसोच्न आग्रह गरे ।

सुकुम्बासीलाई सर्न पनि समय नदिइएको बताउँदै उनले सुकुम्बासी हटाउँदा सामान्य मानवीयताको ख्यालसमेत नगरिएको आरोप लगाए । ‘अवैध सम्पत्ति भत्काउनुस्, अवैध कब्जा हटाउनुस् तर, मानवीयता ख्याल गर्नुस्’ उनले भने। उनले दुई जना सुकुम्बासीले आत्महत्या गरेको सुनाउँदै ‘नागरिकको सुरक्षा सरकारको जिम्मेवारी हो कि होइन ? भनेर प्रश्न गरे ।

शाहीले राज्य गरिब र निमुखाको पक्षमा उभिनुपर्ने बताए ।

प्रकाशित मिति: मंगलबार, वैशाख २९, २०८३

प्रतिक्रिया दिनुहोस्