थापाथली चोकमा ट्राफिकसँग आशिका तामाङको नोकझोक, के भएको थियो ?

काठमाडौँ । काठमाडौँको थापाथली चोकमा राष्ट्रिय स्वतन्त्र पार्टी (रास्वपा)की सांसद आशिका तामाङ र ट्राफिक प्रहरीबीच नोकझोक भएको छ । 

भिडियोमा थापाथली चोकमा हरियो बत्ती बलेपछि पनि ट्राफिक प्रहरीले गाडी अघि बढ्न नदिएपछि आशिका रुष्ट बनेकी देखिन्छ ।

Watch On

घटना आज ३ बजेतिरको हो । आशिका संसद् बैठकबाट फर्कँदै गर्दा थापाथली चोकअघि रेड लाइटमा उनको गाडी रोकियो । केहीबेरमा हरियो बत्ती बलेपछि गाडी अगाडि बढाउन खोज्दा ट्राफिक प्रहरीले रोक्न ईशारा गरेका थिए । जेब्रा क्रसिङमा मानिसहरू ओहोरदोहोर गरिरहेको भन्दै उनले गाडी रोकेका हुन् ।

आशिका गाडीभित्र ड्राइभर छेउको सिटमा थिइन् । जेब्रा क्रसिङको ठिक अगाडि गाडी रोकिएपछि उनले झ्याल खोलेर ट्राफिकलाई बोलाइन् । हरियो बत्ती बलेपछि मान्छे किन कन्ट्रोल नगरेको भनेर प्रहरीलाई प्रश्न गरेको देखिन्छ । तर, प्रहरीले जवाफ नदिएको बताएकी छिन् । 

ती ट्राफिकसँग केही बेर वादविवाद भएपछि आशिका यस्तो अन्याय पनि हुन्छ ? भन्दै गाडीबाट उत्रिइन् । पारीपट्टीको साइडमा अर्का ट्राफिक प्रहरी चिट काटिरहेका थिए । आशिकाले उनीसँग कुरा गरिन् । सम्भवतः ती प्रहरीले आशिकालाई चिने । उनले विवाद गर्ने प्रहरीलाई आफूले सम्झाउने आश्वासन दिएपछि आशिका पुन गाडीमा चढिन् र आफ्नो बाटो लागिन् ।

आशिका तामाङले भने हरियो बत्तीमा पनि गाडी रोकेपछि ट्राफिकलाई सम्झाउन भनेको तर आफूले व्यक्तिगतरुपमा वादविवाद गर्न नखोजेको बताइन् ।