काठमाडाैँ । बुढासुब्बा डिजिटल प्रालिले पशुपतिनाथ आर्यघाट क्षेत्रको बागमती नदी किनारमा हुने गङ्गा आरती र कोर क्षेत्रमा हुने दीप प्रज्वलनको भिडियो खिच्न नपाइने भनी प्रकाशित गरेको सूचनाप्रति पशुपति क्षेत्र विकास कोषले ध्यानाकर्षण भएको जनाएको छ । साथै उक्त सूचनामा कोषको लोगो प्रयोग भएकाप्रति कोषले आपत्ति जनाएको छ । 

“बुढासुब्बा डिजिटल प्रालिले पशुपतिनाथ आर्यघाट क्षेत्रको बागमती नदी किनारमा हुने गङ्गा आरती र कोर क्षेत्रमा हुने दीप प्रज्वलनको भिडियो खिच्न सख्त मनाही छ । यहाँ खिचिएका भिडियो सामग्री फेसबुक, इन्स्टाग्राम, टिकटक तथा युट्युबमा व्यावसायिक प्रायोजनका लागि राखिएमा डिजिटल कपिराइट ऐनअन्तर्गत कारबाही हुने जानकारी गराउदछौँ’ भन्ने सूचना प्रकाशित भएको थियो । 

पशुपतिनाथको आरती बिक्री : यस्तो छ कोष र बुढासुब्बाबिचको सम्झौता

यही सूचनालाई सेयर गर्दै सामाजिक सञ्जालमा पशुपति क्षेत्र विकास कोषको चर्को आलोचना भईहरेको छ । कोषले ध्याकर्षण भएको र आफ्नो संलग्नता नभएको भन्दै आफ्नै दोहोरो चरित्र देखाएको छ । किनकी कोषले बोलपत्र नै आह्वान गरेर कर बाहेक मासिक १ लाख ६० हजार रुपैयाँमा गांगा आरती र कोर क्षेत्रको दिप प्रज्वलनको डिजिटल राइट बेचेको थियाे । सम्झौता गर्दा बुढासुब्बा डिजिटलले ६३ महिनाको बैंक जमानत बापत १ करोड १३ लाख ९० हजार ४०० रुपैयाँ समेत बुझाएको छ । तर अहिले कोषले सो सूचनामा यसबारे खुलाएको छैन । लोगो प्रयोगको विषयमा आपत्ति मात्रै जनाएको छ । र सूचनामा उल्लेख भएको विषयको तथ्य के हो भन्ने चाहीँ खुलाएको छैन । यसबाट आलोचना भएपछि कोष आफू पन्छनको लागि सूचना प्रकाशन गरेको प्रष्ट देखिन्छ ।