एक पूर्वप्रहरीको अपराध श्रृंखला: जागिर छाडेर पेसेवर लुटेरा बने, कारागारबाट भागे

काठमाडौँ । गए राति जडीबुटीमा प्रहरीले गोली चलाएर पक्राउ गरेका गणेश कार्की कारागारबाट फरार रहेका कैदी रहेको खुलेको छ । 

काठमाडौँ बुढानीलकण्ठ नगरपालिका–३ चपली भद्रकालीका ४० वर्षीय कार्कीलाई लुटपाट गरेर भाग्दै गर्दा प्रहरीले पक्राउ गरेको हो । 

Watch On

कार्कीलाई शनिवार राति जडीबुटीस्थित रोयल पार्टी प्यालेस नजिकै जिल्ला प्रहरी परिसर काठमाडौँको टोलीले गोली प्रहार गरेर नियन्त्रणमा लिएको थियो । 

भाग्ने क्रममा बायाँ खुट्टामा प्रहरीले चलाएको गोली लागेको जिल्ला प्रहरी परिसरका एसपी पवनकुमार भट्टराईले जानकारी दिए । कार्कीलाई उपचारका लागि ट्रमा सेन्टरमा राखिएको छ । 

कार्कीको समूहले शनिवार दिउँसो सुके धारामा एक महिलामाथिको साथ सुनसहितका गरगहना लुटपाट गरेका थिए । 

पूर्व प्रहरी देखि  पेसेवर लुटेरा
लुटपाटको घटनामा पक्राउ परेका कार्कीको विभिन्न आपराधिक घटनामा संलग्न पूर्व प्रहरी तथा कारागारबाट फरार भएका कैदी समेत रहेको प्रहरीले जनाएको छ । 

कार्की २०६१ सालमा प्रहरी जवान पदमा भर्ना भएका थिए । उनले २०६४ सालमा सेवा छाडेका थिए ।

प्रहरी सेवा छाडेपछि उनी आपराधिक गतिविधिमा संलग्न भएको देखिन्छन् । 

उनी विरुद्ध २०६४ साल मङ्सिर ९ गते अभद्र व्यवहारको कसुरमा प्रहरी वृत्त बौद्धमा र सोही वर्ष पुस ८ गते हातहतियार तथा खरखजाना मुद्दा बालाजु प्रहरी वृत्तमा दर्ता भएको थियो ।

त्यसपछि २०६८ साल वैशाख २ गते कर्तव्य ज्यान मुद्दामा संलग्न भई दोषी ठहर भएपछि २०६८ असार २० गतेदेखि २०७८ असोज ३ गतेसम्म कैद सजाय भुक्तान गरेका थिए ।

सजाय भुक्तानपछि पनि उनी चोरी तथा डाँका चोरीका मुद्दामा पुन: पक्राउ परेका थिए । 

प्रहरीका अनुसार २०७८ साल फागुन ३ गते   ललितपुर प्रहरीमा चोरी मुद्दा र २०७८ साल फागुन २६ गते प्रहरी वृत्त गौशालामा डाँका चोरी मुद्दा दर्ता भएको थियो ।

२०७९ सालमा डाँका चोरीमा ६ वर्ष सजाएँ भई उनलाई केन्द्रीय कारागारमा राखिएको थियो । 

तर २०८२ भदौ २४ गतेको जेन-जी आन्दोलनका बेला उनी कारागारबाट फरार भएका थिए ।

फरार भएपछि उनले काठमाडौँ उपत्यकाका विभिन्न क्षेत्रमा चोरी, लुटपाट तथा प्रहरीको परिचय दुरुपयोग गरी आपराधिक गतिविधि सञ्चालन गरेको आरोप प्रहरीले लगाएको छ ।

प्रहरीका अनुसार कार्कीले कपन क्षेत्रमा महिला साथीलाई भेट्न जाँदा पक्राउ गर्न पुगेका सादा पोसाकका प्रहरीमाथि धुलो र खुर्सानी छर्केर आक्रमण गरी फरार भएका थिए ।

यस्तै, गौशालामा २०८२ साल असोज ७ गते एक बिजुली पसलमा चोरी तथा लुटपाट गरेको, माघ ११ गते पिङ्लास्थान क्षेत्रमा विदेश जान लागेका एक व्यक्तिबाट नगद ५ हजार रुपैयाँ र मोबाइल फोन लुटेको, चैत महिनामा शान्तिनगरमा गुल्लु खान भन्ने व्यक्तिको मोबाइल फोन लुटपाट गरेको आरोप उनीमाथि छ ।

२०८२ साल फागुन महिनामा पनि तिलगंगामा आफूलाई प्रहरी भएको परिचय दिँदै लागुऔषध र नगद १ हजार ५०० रुपैयाँ लुटेको आरोप उनीमाथि छ ।

उनले पशुपति क्षेत्र, जोरपाटी तथा एयरपोर्ट आसपासका क्षेत्रमा समेत आफूलाई प्रहरीको परिचय दिँदै लागुऔषध प्रयोगकर्ता तथा विदेश जाने यात्रुलाई लक्षित गरी लुटपाट गर्ने गरेको प्रारम्भिक अनुसन्धानबाट खुलेको प्रहरीले जनाएको छ ।

त्यसैगरी, सुन्दरीजल क्षेत्रबाट एक स्कुटर चोरेर कलंकी क्षेत्रमा छाडेको घटनामा समेत उनको संलग्नता रहेको प्रहरीको दाबी छ ।