गठन भएको दुई महिनामा कार्यविधि बनाउँदै संसदीय समितिहरु

Watch On

काठमाडौं । संसदीय समितिहरुले आफ्नो कामकारवाहीलाई विधिमा बाध्न कार्यविधि निर्माणको प्रक्रिया अगाडि बढाएका छन् । २७ चैतमा गठन भएका प्रतिनिधिसभाका १० वटा समिति र दुबै सदनको दुइटा संयुक्त समितिले कार्यविधि निर्माण अगाडि बढाएका हुन् । यीमध्ये संसदीय सुनुवाइ समितिले उत्कृष्ट कार्यविधि बनाएको छ ।

समितिबाट सुनुवाइ भएर जाने प्रधानन्यायाधीश, न्यायाधीश, संवैधानिक आयोगका पदाधिकारी र राजदूतहरुले आफ्नो कार्यप्रगति विवरण प्रत्येक चार महिनामा सार्वजनिक गर्नुपर्ने जवाफदेही कार्यविधि सुनुवाइ समितिले बनाएको छ । अन्य समितिहरु भने कार्यविधि निर्माणकै चरणमा छन् ।

कार्यविधि निर्माण गर्न बुधबार दुइटा समितिको बैठक बस्दैछ । संसद् सचिवालयकाअनुसार समितिको कार्यक्षेत्र र कार्यविधि निर्माण सम्बन्धमा छलफल गर्न कानुन न्याय तथा मानवअधिकार समितिको बैठक विहान ९ बजे सिंहदरबारस्थित समितिको कार्यकक्षमा बस्दैछ ।

यसैगरी शिक्षा, स्वास्थ्य तथा सूचना प्रविधि समितिले पनि आज आफ्नो आन्तरिक कार्यविधि पारित गर्दैछ । कार्यविधि पारित गर्न समिति बैठक ११ बजे बोलाइएको छ । बैठकले उपसमिति गठन पनि गर्नेछ ।

यसैगरी समितिको आन्तरिक कार्यविधि सम्बन्धमा छलफल गर्न सार्वजनिक लेखा समितिको बैठक जेठ २१ गते विहीबार विहान ८ बजे बस्दैछ । बैठकमा लेखा उत्तरदायी अधिकृतहरूसँग बेरुजु न्यूनीकरण सम्बन्धी विषयमा पनि छलफल हुनेछ ।

संसद सचिवालयका प्रवक्ता एकराम गिरीले समितिका कामकारबाहीलाई व्यवस्थित रुपमा सञ्चालन गर्न कार्यविधि बनाउने अभ्यास रहेको बताए । कतिपय समितिले कार्यविधि बनाइसकेको र बन्ने प्रक्रियामा रहेको उनको भनाइ
छ ।