सदनले नसकेको सांसदको हाजिरी विवरण रास्वपा सांसदले सम्हालेको शिक्षा समितिले सार्वजनिक गर्ने

काठमाडौं ।  संघीय संसदमा कार्यान्वयनमा आउन नसकेको सांसदको हाजिरी विवरण सार्वजनिक गर्ने एजेण्डा रास्वपा सांसदले सम्हालेको संसदीय समितिले कार्यान्वयनमा ल्याउने भएको छ । यसका लागि नियम पनि बनाइसकिएको छ । 

रास्वपा सांसद डा. ओजस्वी शेरचन सभापति रहेको प्रतिनिधि सभाको शिक्षा स्वास्थ्य तथा सूचना प्रविधि समितिले पारदर्शिता र जवाफदेहिताका लागि सदस्यहरुको हाजिरी विवरण वेबसाइटमा प्रकाशन गर्ने निर्णय गरेको हो । 

Watch On

समितिले हालै पारित गरेको कार्यविधिको दफा २३ मा 'बैठकमा सदस्यहरुको उपस्थिति सम्बन्धी विवरण सभापतिले प्रत्येक महिना समाप्त भएपछिको बैठकमा जानकारी गराउने र समिति सचिवालयले प्रत्येक बैठकको उपस्थिति सम्बन्धी अभिलेख वेबसाइटमा प्रकाशन गर्नेछ' भनिएको छ । 

यो व्यवस्थाअनुसार अब हरेक बैठकको उपस्थितिको हाजिरी सार्वजनिक हुने समिति सचिव दशरथ धमलाले बताए । उनकाअनुसार हाजिरी विवरण सार्वजनिक हुँदा पारदर्शिता र जवाफदेहितालाई मद्दत पुग्ने अपेक्षा समितिको छ । 
यसअघि प्रतिनिधि सभा र राष्ट्रिय सभामा हरेक बैठकको हाजिरी विवरण सार्वजनिक गर्ने चर्चा चले पनि कार्यान्वयनमा आउन सकेको छैन । सदन नै हाजिरी विवरण सार्वजनिक गर्न आनाकानी गरिरहेका बेला नयाँ राजनीति गर्ने भनेर आएको रास्वपाका सांसदले नियम बनाएर कार्यान्वयनमा लगेका छन् । 

यसैगरी समितिको कार्यविधिमा समय व्यवस्थापनलाई जोड दिइएको छ । बैठकको समय अनुमानयोग्य हुने, समयमा ख्याल गर्ने भनिएको छ । साथै बैठक चलिरहँदा मोबाइल फोन उठाउन नपाइने र आवश्यक परे सभापतिको अनुमति लिएर बाहिर गएर कुरा गर्नुपर्ने नियम पनि बनाइएको छ ।