पाँच दिनसम्म बन्द प्रतिनिधि सभा बैठक बस्दै, बजेटदेखि चारवटा विधेयक कार्यसूचीमा, हट्ला त विपक्षीको अवरोध ?

काठमाडौँ । प्रतिनिधिसभाको बैठक आज बस्दैछ । 

संघ र सात प्रदेशका सभामुखहरुको कैलालीमा आयोजिन सम्मेलनका लागि पाँच दिनसम्म बन्द रहेको प्रतिनिधि सभाको बैठक आज विहान ११ बजे बस्न लागेको हो । 

Watch On

प्रतिनिधि सभा जेठ १७ देखि अवरुद्ध छ । १८ र १९ गतेको बैठक विपक्षीको अवरोधले चल्न सकेको थिएन । 

प्रधानमन्त्री बालेन्द्र शाहले सीमासम्बन्धी दिएको अभिव्यक्तिलाई लिएर विपक्षीले दुबै सदन अवरुद्ध गर्दै आएका छन् । 

प्रधानमन्त्रीले सदनमा आएर अभिव्यक्ति सच्याउनुपर्ने र माफी माग्नुपर्ने उनीहरुको अडान छ । यो नभएसम्म आज पनि सदन चल्न नदिने रणनीतिमा विपक्षी दलहरु छन् । 

विपक्षीहरुसँग सम्वाद गर्न रास्वपा सभापति रबि लामिछानेले विहान ९ बजे सर्वदलीय बैठक डाँकेका छन् । 

बजेटदेखि विधेयकसम्म कार्यसूची 

आजको प्रतिनिधि सभा बैठकमा बजेटमाथि छलफलदेखि चारवटा विधेयकसम्म कार्यसूची छ ।

संसद सचिवालयकाअनुसार अर्थमन्त्री डा. स्वर्णिम वाग्लेले ०८३/०८४ को राजस्व र व्ययको वार्षिक अनुमान (बजेट) माथि सामान्य छलफल प्रारम्भ गरियोस् भनेर प्रस्ताव प्रस्तुत गर्नेछन् । त्यसपछि छलफल प्रारम्भ हुनेछ । छलफलमा उठेका प्रश्नको अर्थमन्त्रीले जवाफ दिनेछन् । 

त्यसपछि अर्थमन्त्री वाग्लेले बजेटसँग सम्बन्धित विनियोजन विधेयक, राष्ट्र ऋण उठाउने विधेयक, नेपाल राष्ट्र बैंक (तेस्रो संशोधन) विधेयक प्रस्तुत गर्नेछन् । 

त्यसपछि पर्यटनमन्त्री खडकराज पौडेलले पर्यटन विधेयकलाई दफावार छलफलका लागि सम्बन्धित समितिमा पठाइयोस् भनेर प्रस्ताव प्रस्तुत गर्नेछन् । सभाले अन्तर्राष्ट्रिय सम्बन्ध र पर्यटन समितिमा पठाउनेछ । 

त्यसपछि श्रममन्त्री रामजी यादवले अन्तर्राष्ट्रिय श्रम संगठनको श्रम निरीक्षण सम्बन्धी महासन्धी १९४७ नम्बर ८१ र अन्तर्राष्ट्रिय श्रम संगठनको बाध्यकारी श्रम महासन्धी १९३० सम्बन्धी सन् २०१४ को प्रोटोकल नम्बर २९ पेस गर्ने कार्यसूची छ ।