रास्वपामा नेतृत्व चुन्न पहिलोपटक ईभीएम मेसिन प्रयोग

काठमाडौँ । राष्ट्रिय स्वतन्त्र पार्टी (रास्वपा)ले आफ्नो संगठन संरचनामा नेतृत्व चुन्न विद्युतीय मतदानको अभ्यास सुरु गरेको छ । चितवनमा ७-९ असारसम्म राष्ट्रिय महाधिवेशनको तयारीमा जुटेको रास्वपाले शनिबार बागमती प्रदेश समितिको नेतृत्व चुन्न विद्युतीय मतदान मेसिन (ईभीएम) प्रयोग गरेको हो ।

पार्टीको केन्द्रीय निर्वाचन आयोगका प्रमुख भुवन केसीकाअनुसार हेटौँडामा विवादले नेतृत्व चुन्न नसकेको बागमती प्रदेशको अधिवेशन काठमाडौँ सारिएपछि सभापति रबि लामिछानेले छरितो, स्पष्ट, पारदर्शी र प्रविधिमैत्री प्रणालीका लागि विद्युतीय मतदानको सुरुवात गर्ने निर्णय गरेका थिए । सभापति लामिछानेको निर्णयअनुसार निर्वाचन आयोगले इलेक्ट्रोनिक भोटिङ मेसिन (ईभीएम) प्रयोग गरेर बागमतीको नेतृत्व चुनेको हो । रास्वपाले यसअघि ईभीएमको प्रयोग गरेको छैन । 

Watch On

'सबै प्रतिनिधि भोटर एकै ठाउँमा किन नगर्ने त इभिएम भनेर विद्युतीय मतदानको अभ्यास गर्‍यौं । यसमा सभापतिज्यूले इनिसियसन लिनुभयो । हेटौँडामा त मतपेटिका नै राखेका थियौं । विवादले काठमाडौँमा गर्ने भएपछि ईभीएममा जाउ भन्ने कुरा भयो । कति समय लाग्ने गरेछ, कस्तो हुँदो रहेछ, प्रोसेस पनि थाहा हुन्छ भनेर सुरु गरियो,' निर्वाचन आयोग प्रमुख केसी भन्छन्, 'सबै जना साथीहरु एकदमै खुसी हुनुभयो । प्रोसेस चाँडो भयो । सबैले देख्ने बुझ्ने मौका पाए । रिजल्ट आधी घण्टामै आयो । प्रक्रिया विश्वसनीय भयो ।'  

केन्द्रीय निर्वाचन आयोगका प्रमुख केसीले ईभीएमलाई अब राष्ट्रिय महाधिवेशनमा पनि प्रयोग गरिने बताए । 'परीक्षणको रुपमा प्रक्रिया सफल भइसकेपछि अब महाधिवेशनमा पनि इभिएम प्रयोग पाइयो । अन्य प्रदेशमा पनि प्रयोग गर्न सकियो । सबै कुरामा डिजिटल हुनुपर्छ भन्ने योजना हो,' केसी भन्छन् । उनले महाधिवेशनमा पनि ईभीएम प्रयोग गरेर दुई घण्टाभित्र रिजल्ट निकाल्ने योजना रहेको बताए । 

उनकाअनुसार देश बाहिर रहेका कार्यकर्ता र शुभेच्छुकका लागि रास्वपाको मोबाइल एपबाटै भोटिङको व्यवस्था मिलाइनेछ । 'नेपाल बाहिर रहेका प्रतिनिधिले पार्टीको मोबाइल एप प्रयोग गर्नुहुन्छ । प्रत्यक्षरुपमा उपस्थित इभिएममा हुनुहुन्छ । त्यो मोडलमा हामी जान्छौं,' उनले भने । 

केन्द्रीय निर्वाचन आयोग प्रमुख केसीले यसअघि पार्टीमा प्रतिनिधिसभा निर्वाचनका लागि समानुपातिक उम्मेदवारहरु प्राइमेरी इलेक्सनमा मोबाइल एपबाट भोटिङ भएको बताए । 'पार्टीभित्रको संरचनामा ईभीएम प्रयोग भएको थिएन । अब पार्टीको अधिवेशन र महाधिवेशनमा ईभीएम प्रयोग हुन्छ,' उनले भने, 'प्रविधिलाई आत्मसात गरेर अगाडि बढ्छौं ।' 

रास्वपाले आफ्नो वाचापत्रमा विदेशमा रहेका नेपाली र अन्तरजिल्ला मतदान विद्युतीय माध्यमबाट गर्न पहल गर्ने उल्लेख गरेको छ । अहिले दुईतिहाइ सरकार चलाइरहेको रास्वपाले पार्टीबाटै विद्युतीय मतदानको अभ्यास सुरु गरेको हो ।