टेम्पो भिरबाट खसालेको घटनामा गृहमन्त्री सुधन गुरुङको एक्सन: १२ जना पक्राउ, पीडितलाई न्याय दिन सिडिओ खटिए

काठमाडौँ । वन अतिक्रमण हटाउने नाममा टेम्पो भिरबाट खसालिएको कैलालीको घटनामा गृहमन्त्री सुधन गुरुङले चासो देखाएका छन् । 

उनले कैलालीका प्रमुख जिल्ला अधिकारी र प्रहरी प्रमुखलाई घटनाको निष्पक्ष छानबिन सत्य तथ्य बाहिर ल्याउन र दोषीलाई कारवाही गरी पीडितलाई क्षतिपूर्ति दिन निर्देशन दिएका हुन् । 

Watch On

गृहमन्त्रीको चासोलगत्तै कैलाली प्रहरीले टेम्पो भिरबाट खसालिदिएको घटनामा अनुसन्धान अगाडि बढाउँदै डिभिजन वन कार्यालय धनगढी र सबडिभिजन कार्यालय अत्तरियाबाट १२ कर्मचारीलाई नियन्त्रणमा लिएको छ । कैलाली प्रहरी प्रवक्ता डिएसपी योगेन्द्र तिमिल्सिनाकाअनुसार वनरक्षकदेखि अधिकृत तहसम्मका कर्मचारीलाई नियन्त्रणमा लिएर सोधपुछ गरिएको हो । 

चुरे क्षेत्रको वन अतिक्रमण हटाउने नाममा वन कार्यालयको टोलीले गत शुक्रबार धनादेवी धामीको टेम्पो भिरबाट खसालिदिएको थियो । टेम्पो भिरबाट खसालेको भिडियो सार्वजनिक भएपछि मानवीयतासँग जोडेर सरकारको चर्को आलोचना भइरहेको छ । वनका कर्मचारीले भने भिरालो जमिन भएकाले टेम्पो हटाउँदा अनियन्त्रित भएर खसेको भन्दै बचाउ गरेपछि झन् विवाद चर्किएको छ ।  

यता प्रमुख जिल्ला अधिकारी हिरालाल रेग्मी पनि घटनाबारे चासो लिँदै पीडितलाई न्याय दिन पहल थालेका छन् । रेग्मीले जिल्ला प्रशासन कार्यालयमा पीडित पक्षसँग आइतबार दिनभर छलफल गरेका थिए ।

आज स्थानीय तहका जनप्रतिनिधिको उपस्थितिमा छलफल गरेर पीडितलाई न्याय दिनेगरी सहमति गर्न खोजिने रेग्मी बताउँछन् ।