समाज

मनिषले हर्कलाई भने– ‘बालहठ नगर्नुस् माननीयज्यू'

सिधाकुरा

बुधबार, असार ३, २०८३

मनिषले हर्कलाई भने– ‘बालहठ नगर्नुस् माननीयज्यू'

काठमाडौं । प्रतिनिधिसभाको बैठकमा श्रम संस्कृति पार्टीका सांसद हर्कराज साम्पाङ राईले आफ्नो प्रश्नको जवाफ मन्त्रीबाट नआएको भन्दै अवरोध गरिरहँदा रास्वपा सांसद मनिष झाले राईलाई बालहठ नगर्न सुझाव दिएका छन् ।

बैठकमा उद्योगमन्त्री गौरीकुमारी यादवले सांसदहरूको प्रश्नको जवाफ दिइरहेकी थिइन् । त्यही बीचमा श्रम संस्कृति पार्टीका अध्यक्ष साम्पाङ उठे र आफ्नो स्पष्टीकरण दोहोर्‍याए ।

Watch On

त्यसपछि सभामुख डीपी अर्यालले स्पष्टीकरणमाथिको स्पष्टीकरण नहुने भन्दै साम्पाङको ध्यानाकर्षण गराए । तर, सांसद राईले उठेर अवरोध जनाइरहे ।

त्यहीबीचमा रास्वपा सांसद मनिष झाले नियमापत्ति जनाए । उनले प्रतिनिधिसभामा नियमावलीको ५४ र ५५ नम्बरमा प्रश्नोत्तरको विषय उल्लेख गरे ।

‘पटकपटक वादविवाद गर्ने, मेरो प्रश्नको जवाफ आएन भन्ने, ५४ नम्बरमा उत्तर दिन अस्वीकार गर्न सकिने अधिकार पनि उल्लेख गरिएको छ । माननीय मन्त्रीज्यूले मेरो उत्तर यही हो भन्न पाउनहुुन्छ,’ झाले भने ।

सांसद झाले साम्पाङलाई पटकपटक बालहठ नगर्न अनुरोध गर्दै भने– ‘म सम्बन्धित माननीयज्यूलाई पटकपटक बालहठ नगर्न पनि आग्रह गर्छु । नियम कानुनको कुरा गर्दै हुनुहुन्थ्यो, नियम त स्पष्ट लेखिएकै छ, नियम पढ्नुस्।’

त्यसपछि सभामुख अर्यालले बैठकलाई अगाडि बढाए ।

प्रकाशित मिति: बुधबार, असार ३, २०८३

प्रतिक्रिया दिनुहोस्