रास्वपा महाधिवेशनमा चितवन जानेलाई होटलमा छुट

चितवन । रास्वपाको पहिलो महाधिवेशनका लागि चितवन पुग्ने पाहुनाहरुलाई यहाँका होटल व्यवसायीले सम्मानमा कुनै पनि प्रकारका कमी हुन नदिने बताएका छन् ।

सत्तारुढ दल, राष्ट्रिय स्वतन्त्र पार्टी (रास्वपा) को प्रथम केन्द्रीय महाधिवेशनमा आउने प्रतिनिधि र पर्यवेक्षक पाहुनाको सम्मानमा होटल व्यवसायी र क्षेत्रीय होटल संघ चितवनले सम्मानमा कुनै कमी हुन नदिने बताएका हुन् ।

Watch On

आगामी असार ७ गतेदेखि ९ गतेसम्म चितवनको भरतपुरमा रास्वपाको प्रथम महाधिवेशन हुन गइरहेको छ । सो महाधिवेशन आउने अतिथिहरुका सम्मानमा कुनै पनि प्रकारको कमी हुन नदिन यहाँस्थित होटल व्यवसायीले सक्रियता देखाएका छन् ।

होटल व्यवसायी संघ चितवनका अध्यक्ष ऋषिकेश अर्यालले यहाँ आयोजना हुन गइरहेको रास्वपाको प्रथम केन्द्रीय महाधिवेशनमा आउने पाहुनाका लागि    आवासमा २५ प्रतिशत,  खाना र पेयपदार्थमा १० प्रतिशत छुटको व्यवस्था गरिएको जानकारी दिए ।

भरतपुर महानगरभित्र र गैँडाकोट क्षेत्रमा रहेका होटल तथा रेष्टुरेन्टमा महाधिवेशनमा आएका पाहुनालाई  छुटको व्यवस्था गरिएको हो । पाहुनाले छुट पाए नपाएको अनुगमन गर्नका लागि समितिसमेत गठन गरिएको क्षेत्रीय होटल संघका अध्यक्ष ओमप्रकाश पाण्डेले बताए । 

क्षेत्रीय होटल संघमा ९०  होटल आबद्ध छन् । ती होटलमा १० हजार जना अट्ने क्षमता छ । होटल संघमा ६७१ सदस्य छन् । संघभित्र चिया पसल, रेष्टुराँ र होटल पनि भएकाले यकिन क्षमता भन्न नसकिने संघले जनाएको छ ।

राष्ट्रिय स्वतन्त्र पार्टीको महाधिवेशनका लागि गठित आवास तथा भोजन उपसमितिका संयोजक राजन गौतमले चितवनका होटलका तीन हजारभन्दा बढी कोठा रास्वपाका प्रतिनिधि र पर्यवेक्षकले भरिने बताए । महाधिवेशनमा सहभागी हुने प्रतिनिधिले आवासको खर्च आफैँ व्यहोर्नेुपर्ने छ ।