अख्तियारले आरजुको नाममा गरेको म्याद तामेलीमा के छ ?

काठमाडौँ । अख्तियार दुरुपयोग अनुसन्धान आयोगले विद्युतीय राहदानी (ई–पासपोर्ट) छपाइमा भएको अनियमिततामा बयानका लागि उपस्थित हुन तत्कालीन परराष्ट्रमन्त्री आरजु राणा देउवाको नाममा म्याद तामेली गरेको छ ।

अख्तियारले असार २ गते सूचना निकाले पनि असार ३ गते दिउँसो बुढानीलकण्ठस्थित देउवाको पुरानो घरको गेटमा म्याद तामेलीको सूचना टाँसेको हो ।

Watch On

बयान लिनुपर्ने व्यक्तिसँग सम्पर्क हुन नसकेपछि यसरी म्याद तामेलीको सूचना टाँस्ने गरिन्छ । आयोगले आरजुलाई ‘सूचना टाँस भएको मितिले बाटोको म्याद बाहेक तीन दिन भित्र उपस्थित हुन’ भनेको छ ।

आयोगको सूचनामा भनिएको छ– ‘यस आयोगमा परेको वादी नेपाल सरकार प्रतिवादी आरजु राणा देउवा समेत भएको राहदानी छपाई सम्बन्धी कार्यमा भ्रष्टाचारजन्य कसुर गरेको भन्ने उजुरीको अनुसन्धानको सिलसिलामा तपाईसँग बयान लिनुपर्ने भएकोले यो सूचना बुझेको वा तपाईको घरदैलोमा टाँस भएको मितिले बाटोको म्याद बाहेक ३ (तीन) दिनभित्र यस आयोगको महाशाखा नं १२, कोठा नं १२ टंगाल, काठमाडौंमा उपस्थित हुन आउनु होला, नआए कानून बमोजिम हुनेछ।’

अख्तियारले ३ दिनभित्र उपस्थित हुन भन्दै म्याद तामेली गरे पनि आरजु भने नेपालमा छैनन् । गत फागुन ३ गते नै उपचारका लागि भन्दै सिंगापुर गएका देउवा दम्पत्ति फर्केका छैनन् । 

ई–पासपोर्ट प्रकरणमा अख्तियारले यसअघि नै राहदानी विभागका महानिर्देशक तीर्थराज अर्यालसहित ४ जनालाई पक्राउ गरिसकेको छ । पासपोर्ट छाप्ने ठेक्का लिएका दुई विदेशी कम्पनी (जर्मन कम्पनी)का प्रतिनिधिलाई पनि बयानमा उपस्थित हुन आयोगले सार्वजनिक सूचना जारी गरेको छ ।