काठमाडौँ अदालतबाट पनि हट्यो रवि लामिछानेको संगठित अपराधको मुद्दा

काठमाडौँ । रास्वपा सभापति रवि लामिछानेविरुद्ध काठमाडौँ जिल्ला अदालतमा दायर मुद्दा संशोधन भएको छ । लामिछानेमाथि सहकारी ठगी र संगठित अपराधको कसुरमा मुद्दा दायर भएकोमा अदालतले सहकारी ठगीको अभियोग कायमै राखी संगठित अपराधको कसुर हटाएको हो ।

न्यायाधीश आत्मदेव जोशीको इजलासले ‘अभियोगपत्र संशोधन गरिपाउँ’ भन्ने निवेदन स्वीकार गरेको हो । त्यसअघि इजलासमा नेपाल सरकारका तर्फबाट जिल्ला न्यायाधिवक्ताद्वय गोविन्दप्रसाद हुमागाईँ र सन्तोष कटुवाल र प्रतिवादी रवि लामिछानेका तर्फबाट अधिवक्ताहरु दिपेन्द्र झा र आमितेश पण्डितले बहस गरेका थिए ।

Watch On

बहसपछि न्यायाधीश जोशीले अभियोग पत्र संशोधन गर्ने आदेश दिएका हुन् ।

आदेशमा भनिएको छ– ‘संगठित रुपमा ठगी गरेको मुद्दाको अभियोगपत्रमा ठगीतर्फको अभियोग कायम राखी संगठित अपराधतर्फको अभियोग कायम नरहने गरी मुलुकी फौजदारी कार्यविधि संहिता २०७४ को दफा ३६ बमोजिम यो संशोधन आदेश गरिदिएको छ । प्रस्तुत संशोधन आदेशलाई अभियोगपत्रहरुको अभिन्न अंग मानी मिसिल संलग्न राखी नियमानुसार गर्नू।’

स्वर्णलक्ष्मी सहकारीको रकम अपचलनलाई लिएर सरकारले रवि लामिछानेसमेत विरुद्ध काठमाडौँ जिल्ला अदालतमा सहकारी ठगी र संगठित अपराधको अभियोगमा मुद्दा दायर गरेको थियो । 
यसअघि कास्की, रुपन्देही र पर्सा जिल्ला अदालतले पनि रवि लामिछानेविरुद्ध दायर मुद्दा संशोधन गरेका थिए ।