रास्वपाको विधान पारित, सभापति रवि लामिछानेले दिए सबैलाई धन्यवाद

काठमाडौँ । राष्ट्रिय स्वतन्त्र पार्टी (रास्वपा) केन्द्रीय समितिको बैठकले पार्टीको विधान पारित गरेको छ । आज चितवनको भरतपुरमा बसेको बैठकले विधान पारित गरेको हो । महाधिवेशनको बन्दसत्रले अनुमोदन गरेपछि नयाँ विधान लागु हुनेछ ।

नयाँ विधान अनुसार रास्वपा केन्द्रीय समिति अब १५१ सदस्यीय हुने छ । यसमा सात प्रदेश सभापति पदेन सदस्य रहने छन् । १०० केन्द्रीय सदस्य निर्वाचित हुने छन् भने सभापतिले ५० जना मनोनीत गर्नेछन् । नयाँ विधानमा पदाधिकारीको संख्या पनि बढाइएको छ ।

Watch On

बैठकमा सभापति रवि लामिछानेले परिवर्तित समयअनुसार विधान संशोधन गरिएको बताएका थिए । त्यस्तै, उनले रास्वपा स्थापनादेखि हालसम्म साथ दिएका केन्द्रीय समितिका सबै पदाधिकारी र सदस्यहरुलाई धन्यवाद पनि दिए ।

बैठकपछि सञ्चारकर्मीहरुसँग कुरा गर्दै प्रवक्ता मनिष झाले आज साँझसम्म ३,९१९ महाधिवेशन प्रतिनिधिले शुल्क तिरेर नाम दर्ता गरेको जानकारी दिए । महाधिवेशन प्रतिनिधि दर्ताका लागि प्रतिव्यक्ति ५ हजार रुपैयाँ तोकिएको छ ।

उनका अनुसार, हालसम्म रास्वपाका सक्रिय सदस्यहरुको संख्या ५ लाख नाघेको छ । महाधिवेशन प्रक्रिया अन्तर्गत मधेश प्रदेशबाहेक ६ वटा प्रदेशको अधिवेशन भएको छ ।

आजकै बैठकमा उपसभापति स्वर्णिम वाग्लेले रास्वपाको नेतृत्व, नीति र संघर्षका बारेमा चर्चा गरेका थिए ।