महामन्त्रीमा विपिनलाई प्रमोद र पराजुलीको समर्थन

चितवन । रास्वपा महामन्त्रीमा विपिन आचार्यलाई अन्य २ उम्मेदवारले समर्थन गरेका छन् ।

निर्वाचन आयोगले सार्वजनिक गरेको उम्मेदवारको नामावलीअनुसार, महामन्त्रीमा विपिनसँगै प्रमोद न्यौपाने, राजुनाथ पाण्डे, मनिष झा, रन्जु दर्शना, गणेश कार्की, गणेश पराजुली र सागर ढकालले उम्मेदवारी दिएका थिए ।

Watch On

तीमध्ये प्रमोद न्यौपाने र गणेश पराजुलीले विपिनलाई समर्थन गर्दै आफ्नो उम्मेदवारी फिर्ता लिएका छन् ।

त्यसअघि कविन्द्र बुर्लाकोटी, जगदीश खरेल र शिशिर खनालले पनि उम्मेदवारी लिएका थिए । उनीहरुले पनि विपिन आचार्यलाई नै आफ्नो समर्थन रहेको बताएका छन् । महामन्त्रीका अर्का उम्मेदवार राजुनाथ पाण्डेले पनि उम्मेदवारी फिर्ता लिएका छन्।

अब महामन्त्रीमा ५ उम्मेदवार कायम रहेका छन् । निर्वाचन आयोगले सार्वजनिक गरेको उम्मेदवारको अन्तिम नामावली अनुसार, महामन्त्रीमा विपिन आचार्य, मनिष झा, रन्जु दर्शना, गणेश कार्की र सागर ढकाल उम्मेदवार छन् ।

३ सहमहामन्त्री (२ खुला र १ महिला) मा १६ जनाको उम्मेदवारी परेको छ । खुलातर्फ ११ र महिलातर्फ ५ जनाले उम्मेदवारी दिएका छन् ।

खुलातर्फ रमेश प्रसाईं, यज्ञमणि न्यौपाने, सुलभ खरेल, असिम शाह, अशोककुमार चौधरी, मिलन लिम्बू, पुकार बम, राजीव खत्री, विजय जैरु, हरि ढकाल र हिमेश पन्तले उम्मेदवारी दिएका छन् ।

महिलातर्फ जुली यादव, जमुना शर्मा(विदुषी), कामिनीकुमारी चौधरी, निशा डाँगी र रिमा विश्वकर्माको उम्मेदवारी परेको छ ।

एक महिला उपसभापतिमा दुई जनाको मात्रै उम्मेदवारी परेको छ । सोविता गौतम र तोसिमा कार्कीले महिला उपसभापतिमा प्रतिस्पर्धा गरेका छन् ।

खुला उपसभापतिमा भने डा. स्वर्णिम वाग्लेको मात्रै उम्मेदवारी परेपछि उनी निर्विरोध भएका छन् ।