रास्वपा पदाधिकारी छान्न अझै १ घण्टा मतदान

चितवन । राष्ट्रिय स्वतन्त्र पार्टी (रास्वपा) का ६ पदाधिकारी चयनका लागि जारी मतदानको समय अझै करिव एक घण्टा लम्ब्याइएको छ ।

मतदानका लागि दिउँसो साढे ४ बजेसम्मको समय तोकिएको भए पनि प्रतिनिधिहरु आउने क्रम जारी रहेकाले मतदानको समय लम्ब्याइएको हो । निर्वाचन आयोगका प्रतिनिधिहरुले अझै एक घण्टा जति मतदान जारी रहने बताएका छन् ।

Watch On

रास्वपामा आज एक उपसभापति(महिला), एक महामन्त्री र ३ सहमहामन्त्री( दुई खुला, एक महिला) का लागि दोस्रो चरणको मतदान भइरहेको छ ।

महिला उपसभापतिमा सोविता गौतम र तोसिमा कार्की प्रतिस्पर्धामा छन् । एक महामन्त्रीका लागि विपिन आचार्य, मनिष झा, गणेश कार्की र सागर ढकाल उम्मेदवार छन् ।

३ सहमहामन्त्री (२ खुला र १ महिला) मा १६ जनाको उम्मेदवारी परेको छ । खुलातर्फ ११ र महिलातर्फ ५ जनाले उम्मेदवारी दिएका छन् ।

खुलातर्फ रमेश प्रसाईं, यज्ञमणि न्यौपाने, सुलभ खरेल, असिम शाह, अशोककुमार चौधरी, मिलन लिम्बू, पुकार बम, राजीव खत्री, विजय जैरु, हरि ढकाल र हिमेश पन्तले उम्मेदवारी दिएका छन् ।

महिलातर्फ जुली यादव, जमुना शर्मा(विदुषी), कामिनीकुमारी चौधरी, निशा डाँगी र रिमा विश्वकर्माको उम्मेदवारी परेको छ ।

खुला उपसभापतिमा भने डा. स्वर्णिम वाग्लेको मात्रै उम्मेदवारी परेपछि उनी निर्विरोध भएका छन् ।

यसैबीच, रास्वपाका नवनिर्वाचित पदाधिकारी तथा केन्द्रीय सदस्यहरुको सपथ ग्रहण आजै हुने भएको छ । निर्वाचन आयोगले साँझ साढे ६ बजे नवनिर्वाचित सबै पदाधिकारी र सदस्यहरुको सपथ हुने जनाएको छ ।