पदाधिकारीको निर्वाचन सकियो, केहीबेरमा घोषणा

काठमाडौँ । रास्वपा महाधिवेशनमा पदाधिकारी छान्न गरिएको मतदान सकिएको छ । पदाधिकारीका लागि करिव १३ सय प्रतिनिधिले मतदान गरेका छन् ।

रास्वपा महाधिवेशनमा कुल ३८५९ प्रतिनिधि सहभागी भए पनि पदाधिकारीमा भने न्युन संख्यामा मात्रै मतदान भएको छ । करिव एक तिहाइ प्रतिनिधिले मतदान गरेको निर्वाचन आयोगको अनुमान छ ।

Watch On

आज एक महिला उपसभापति, एक महामन्त्री र ३ सहमहामन्त्री (एक महिलासहित) गरी ५ पदाधिकारी छान्न मतदान भएको हो ।

महिला उपसभापतिमा सोविता गौतम र तोसिमा कार्की प्रतिस्पर्धामा छन् । एक महामन्त्रीका लागि विपिन आचार्य, मनिष झा, गणेश कार्की र सागर ढकाल उम्मेदवार छन् ।

३ सहमहामन्त्री (२ खुला र १ महिला) मा १६ जना उम्मेदवार छन् । खुलातर्फ ११ र महिलातर्फ ५ जनाले उम्मेदवारी दिएका छन् ।

खुलातर्फ रमेश प्रसाईं, यज्ञमणि न्यौपाने, सुलभ खरेल, असिम शाह, अशोककुमार चौधरी, मिलन लिम्बू, पुकार बम, राजीव खत्री, विजय जैरु, हरि ढकाल र हिमेश पन्तले उम्मेदवारी दिएका छन् ।

महिलातर्फ जुली यादव, जमुना शर्मा(विदुषी), कामिनीकुमारी चौधरी, निशा डाँगी र रिमा विश्वकर्माको उम्मेदवारी परेको छ ।

खुला उपसभापतिमा भने डा. स्वर्णिम वाग्लेको मात्रै उम्मेदवारी परेपछि उनी निर्विरोध भएका छन् ।

अब केहीबेरमा मतपरिणाम सार्वजनिक गर्ने तयारी भइरहेको छ ।

पदाधिकारीको मतपरिणाम सार्वजनिक गरे लगत्तै केन्द्रीय समितिमा निर्वाचित सभापतिसहित सबै पदाधिकारी र सदस्यहरुको आजै सपथ हुने निर्वाचन आयोगले जनाएको छ ।