एयरपोर्टमा रोकिएका एन्फा पदाधिकारीलाई खेलकुदमन्त्रीको जवाफः विश्वकप हेर्न रहर गर्नेले आशा जगाउने काम गरेको हुनुपर्छ

काठमाडौँ । शिक्षा तथा खेलकुदमन्त्री सस्मित पोखरेलले एन्फा यो भन्दा तल जाने ठाउँ नै नभएको बताएका छन् । बिहीबार मन्त्रिपरिषद् बैठकपछि सञ्चारकर्मीलाई प्रतिक्रिया दिदै विगतका सरकारबाट एन्फामा अत्याधिक हस्तक्षेप भएको बताएका हुन् । उनले एन्फामा भ्रष्टाचार भएको दावी गर्दै परेको उजुरीमा छानबिन भइरहेको बताए । 

‘विगतका सरकारबाट धेरैपटक एन्फामा हस्तक्षेप भएको थियो । एन्फामा धेरैवटा भ्रष्टाचार भएको उजुरी हामीलाई परेको छ । हामीले राखेपको उपाध्यक्षको अध्यक्षतामा छानबिन समिति पनि गठन गरेका छौँ । छानबिन समितिको प्रतिवेदन आएपछि सम्बन्धित नियकामा पठाउँछौँ ।’

Watch On

एन्फा निलम्बनमा पर्नुमा अहिलेको सरकार कारक नरहेको बताए । ‘फिफाले एन्फालाई अहिलेको सरकारले हस्तक्षेप गरेका कारण निलम्बन गरेको होइन । बिभिन्न बेलामा बिभिन्न तहबाट हस्तक्षेप भइरहेको थियो ।’ 

उनले एन्फाका पदाधिकारीलाई विश्वकप हेर्न जाने क्रममा एयरपोर्टबाट फर्काइएको विषयमा पनि स्पष्टिकरण दिएका छन् । ‘उहाँहरुले विश्वकप हेर्न जान हामीलाई रोक्यो भन्दै हुनुहुन्छ । विश्वकप हेर्न एन्फाको पदाधिकारी त्यतिखेर जानुहुन्छ जतिखेर नेपालको फुटबलले केही न केही आशा देखाएको हुनुपर्छ । विश्वकप नै खेल्नुपर्छ भन्नेपनि छैन । लोकल गेमहरु हुन सकेको छैन । भ्रष्टाचारका उजुरीहरु छन् । नेपालको फुटबल विकास हुन सकेको छैन । यो भन्दा तल जाने ठाउँ नै छैन एन्फालाई ।’ 

उनले एन्फामा रहेको बेथिति सुधारको लागि प्रयास भइरहेको बताए । यस सम्बन्धमा आफूले पहल जारी राखेको र वार्ताको प्रयास गरिरहेको खेलकुदमन्त्री पोखरेलले बताए । अब बन्ने एन्फामा नेपाली फुटबलमा योगदान गरेको व्यक्तिहरुलाई समेट्ने पनि उनले बताए । ‘अहिले फिफाले निलम्बन गर्दा हामीलाई चित्त दुखेको छ । तर यो भन्दा तल जाने ठाउँ नै छैन । हामीले केही बोल्ड स्टेपहरु लिनुपर्छ । लिएको पनि हो । अब हामीले एन्फालाई माथि उठाउँछौँ । एन्फालाई राजनीतिक भर्तिकेन्द्र हुन दिदैनौँ ।’