ज्ञानेन्द्र शाहीको प्रश्न : मन्त्रीहरु हेलिकप्टरमा शयर गर्न हुने, कर्णालीमा नागरिक डुब्दा उद्धार गर्न नहुने ?

काठमाडौँ । राप्रपा संसदीय दलका नेता ज्ञानबहादुर शाहीले कर्णाली नदीमा सवारी दुर्घटना हुँदा सरकारले उद्धारमा चासो नदेखाएको भन्दै आपत्ति जनाएका छन् । 

प्रतिनिधि सभाको सोमबार बसेको बैठकको आकस्मिक समयमा बोल्दै शाहीले चैत १८ गते कर्णाली नदीमा गाडी खसेको, मानिसहरु बचाउ भनेर हारगुहार गरेको, एक जना भीरमा अड्केर गुहार मागेको तर उद्धार नआएको बताए । उनले त्यही आकाशमा हेलिकप्टर उडेको तर त्यो उद्धारका लागि नभई मन्त्रीको सवारीका लागि भएको बताए । 

Watch On

'सरकारका केन्द्रीय मन्त्री कर्णालीको आकाशमा घुमिरहेका थिए । प्रदेशसभामा भाग पुगेन भन्दै सांसदहरु भागवण्डाका लागि एकआपसमा झगडा गरिरहेका थिए । तर कर्णलीका जनता जीवन बचाइदेउ भनेर हारगुहार गरिरहेका थिए । उद्धार टोलीसँग साधन थिएन,' उनले भने । 

सुर्खेतबाट दुर्घटनास्थलसम्म पुग्न ५ घण्टा लाग्ने तर हेलिकप्टर आकाशमा उड्दै गर्दा उद्धारका लागि एउटा हेलिकप्टर पठाउने क्षमता सरकारसँग नभएको उनले बताए । 'सरकारले काम कसको लागि गरिरहेको छ, भाषण किन ठोकेको छ ? देशको सबको साझा हो । २४ घण्टा वित्यो । हेलिकप्टर गएन । प्रदेश सरकारले पनि २४ घण्टापछि प्रदेश सरकारले निर्णय गर्यो तर भीरमा अड्केको मान्छे बचाउन सकेनौं । सुरक्षाकर्मी पुग्यो, उद्धार गर्न होइन मुचुल्का गर्न पुग्यो,' उनले भने ।  

शाहीले कर्णालीले दयाको भिख मागेको होइन अधिकार मागेको बताए । 'मेरो प्रश्न छ कर्णाली नेपालमा हो कि होइन ? मन्त्रीहरु हेलिकप्टरमा शयर गर्दा कर्णालीमा नागरिक डुब्दाखेरी उद्धार गर्न नहुने ? के कर्णाली यो देशका नागरिक हुन कि होइन ?' उनले सोधे ।  

शाहीले यो घटनाबारे जानकारी गराउनका लागि सरकारलाई रूलिङ गर्न माग गरे ।