प्रधानमन्त्रीले सम्पति विवरणका देखाएको सुनको स्रोत के हो ?: भीष्मराज आङदेम्बे

काठमाडौँ । प्रमुख प्रतिपक्षी दल नेपाली कांग्रेसले प्रधानमन्त्री बालेन्द्र शाह (बालेन)को सम्पति स्रोतमाथि प्रश्न उठाएको छ । नेपाली कांग्रेस संसदीय दलका नेता भीष्मराज आङदेम्बेले प्रधानमन्त्री र मन्त्रीहरुको सम्पति विवरणमा धेरै सुन देखिएको बताउँदै त्यसको स्रोतबारे प्रश्न गरेका हुन् । 

‘प्रधानमन्त्रीजीको सम्पतिमा झण्डै दुई सय तोला सुन देखियो । अन्य मन्त्रिपरिषद्का सदस्यहरूको त्यस्तै धेरै देखियो ।’ उनले भने, ‘नेपाली कांग्रेस किन सम्पति आर्जन गर्नुभयो, किन जम्मा गर्नुभयो यो सोध्नैन । तर सुन आर्जनको स्रोत के हो ? यो जनताले जान्न पाउनुपर्छ ।’

Watch On

उनले यो प्रश्न सोध्ने विपक्षीको उत्तरदायीत्व भएको बताए । उनले उच्च पदस्थ व्यक्तिको सम्पति छानबिन गर्न सरकारले बनाएको समितिबारे उल्लेख गर्दै आफैँबाट छानबिन सुरु गर्न र सँगै प्रधानमन्त्रीको पनि छानबिन गर्न आग्रह गरे । 

उनले प्रधानमन्त्रीको सुन देखेर जनता छक्क परेको बताउँदै त्यसको स्रोत के हो भनेर प्रश्न गरिरहेको दावी गरे । भ्रष्टाचारमाथिको निष्पक्ष छानबिनको लागि प्रधानमन्त्री तयार हुनुपर्ने उनको भनाइ छ । 

त्यस्तै आङदेम्बेले संविधान संशोधनको नाममा मर्म, लोकतान्त्रिक मूल्य र सङ्घीय व्यवस्थामाथि छेडखानी स्वीकार्य नहुने बताए । संविधान संशोधन जस्तो गम्भीर विषयमा अहिलेसम्म गम्भीर र घनिभूत संवाद हुन नसकेको उनको तर्क छ ।