एमाले कार्यदलको बैठक बस्दै, ओली हटाउने प्रतिवेदन बन्ला ?

काठमाडौँ । नेकपा एमालेको पुनर्गठन सुझाव कार्यदलको बैठक आज बस्दैछ । 

एमाले प्रचार विभाग प्रमुख निरज आचार्यकाअनुसार विहान ११ बजे केन्द्रीय कार्यालय च्यासलमा बैठक बस्दैछ । उनकाअनुसार कार्यदलले ८ वटा भौगोलिक, एउटा गैरभौगोलिक, सबै जनसंगठनहरू, विभाग र केन्द्रीय निकायहरुसँग सुझाव लिइसकेको छ । 

Watch On

यसअघि २२ गते बस्ने भनिएको बैठक तयारी नपुगेको भन्दै स्थगित भएको थियो । 

कार्यदलका एक सदस्यकाअनुसार अधिकांश प्रदेशबाट प्रतिनिधित्व गर्ने केन्द्रीय सदस्यहरू, सम्बन्धित प्रदेशका पदाधिकारी र जिल्ला नेताहरू पुनर्गठनको पक्षमा खुलेका छन् । 'प्रदेशहरूका ७० प्रतिशतभन्दा बढी सदस्यहरू पुनर्गठनको पक्षमा खुलेका छन् । पार्टी यथास्थितिमा अगाडि बढ्न नसक्ने, केपी ओलीलाई नै अध्यक्षमा यथावत् राखेर जाँदा तलबाट पार्टी उठाउन नसकिने धारणा प्रदेश पदाधिकारी र जिल्ला तहका नेताबाट आएको छ,' ती सदस्यले भने, 'जनसंगठनतर्फ पनि पार्टीको यही नेतृत्वलाई कायम राखेर जाँदा संगठन विस्तार गर्न कठिन हुने धारणा राख्नुभएको छ । 

ती सदस्यले तलबाट आएका सबै सुझावहरूलाई एकीकृत गरेर प्रतिवेदनको रुप दिइने बताए । गत जेठ १० गते सकिएको एमाले केन्द्रीय सचिवालयको आठौं बैठकले पार्टीलाई पुनर्गठन गर्ने विषयमा तलबाट सुझाव माग्नेगरी उपाध्यक्ष रामबहादुर थापा बादलको नेतृत्वमा पदाधिकारी तहका सात र ८ प्रदेश इन्चार्जहरु रहेको कार्यदल गठन गरेको थियो । कार्यदलले ८ वटै प्रदेश स्तरका कमिटी, जनसंगठनहरूबाट छुट्टाछुट्टै सुझाव लिएको थियो । कार्यदलले सुझाव लिनुअघि अध्यक्ष ओलीले सातवटा प्रदेशलाई जुम मार्फत सम्बोधन गरेका थिए । बागमती प्रदेशमा भने कार्यदलसँगको छलफलपछि केन्द्रीय सदस्य एवं प्रदेश र जिल्ला तहका नेताहरूलाई गुण्डुस्थित निवासमै बोलाएर छलफल गरेका थिए । 

पुनर्गठनको पक्षमा माहोल कमजोर बनोस् भन्ने ध्येयले अध्यक्ष ओलीले कार्यदलको बैठक अगाडि सम्बोधन गरेर छलफल प्रभावित गर्न खोजेको पनि कार्यदलका सदस्यले बताएका छन् । तथापि पुनर्गठनको पक्षमा तलबाट माहोल तयार भएकाले सोहीअनुरुप प्रतिवेदन तयार हुने कार्यदलका सदस्यहरूको भनाइ छ । 

जेठ १० गते सकिएको सचिवालयको आठौं बैठकले १५ सदस्यीय चुनावी समीक्षा तथा पार्टी पुनर्गठन सुझाव कार्यदल गठन गर्दै एक महिनाभित्र प्रतिवेदन बुझाउन भनेको थियो । एक महिना १२ दिन वित्दा पनि कार्यदलले सुझाव लेखन नै थालेको छैन । कार्यविधि नै बनाउन बाँकी रहेको सदस्यहरुले बताएका छन् ।

कार्यदलले बनाएको सुझाव प्रतिवेदन सचिवालय बैठकमा पेस हुनेछ । त्यही सचिवालयले केन्द्रीय कमिटी बोलाउने र त्यहाँ छलफल गर्ने यसअघि तय गरिएको थियो ।

गत फागुन २१ गते भएको प्रतिनिधि सभा निर्वाचनमा एमाले २५ सीटमा खुम्चिएपछि पार्टी नेतृत्वमा ओलीको विकल्प खोज्न थालिएको र एमालेभित्र पार्टी पुनर्गठनको बहसले गति लिएको हो । बीचमा उपाध्यक्ष विष्णु पौडेल पक्राउ परेपछि पुनगर्ठनको बहस केही मत्थर भएको आभाष नेता कार्यकर्ताले गरेका छन् ।

पछिल्लो समय उपाध्यक्ष पौडेल र पृथ्वीसुब्बा गुरुङ, महासचिव शंकर पोखरेलले पुनर्गठन अभियानको नेतृत्व गरिरहेका छन् ।