त्रिपुरेश्वर आत्मदाह प्रयासः दाजुले गाउँमा फोन गरेर भने – अवस्था सामान्य छ

काठमाडौँ । त्रिपुरेश्वरको राहदानी विभागअगाडि आत्मदाह प्रयास गरेका गणेश नेपालीको अवस्थाबारे उनका दाजु मदनले मुगुमा रहेका उनका परिवारलाई जानकारी गराएको वडाध्यक्ष धनकर्ण छत्यालले बताएका छन् । मुगुको सोरु गाउँपालिका वडा नं ०१ का   नेपालीले बिहीबार दिउँसो शरीरमा पेट्रोल छर्केर आत्मदाह प्रयास गरेका थिए । 

उनको अहिले वीर अस्पतालमा उपचार भइरहेको छ । उनको अवस्थाबारे प्रहरीले कुनै जानकारी दिएको छैन । वडाध्यक्ष छत्यालका अनुसार दाजु मदनले परिवारलाई ‘अवस्था सामान्य छ, त्यति नआत्तिनु’ भनेर परिवारलाई सान्त्वना दिएका छन् । उनको अवस्थाबारे पालिकाले पनि बुझ्ने कोसिस गरिरहेको, पारिवारिक अवस्था र घटनाको कारणबारे पनि पत्ता लगाउने कोसिस भइरहेको उनले बताए । 

Watch On

नेपाली पेसाले राइड सेयरिङ (पठाओ) चालक रहेको प्रहरीले जनाएको छ । 

बिहीबार दिउँसो त्रिपुरेश्वरमा बाइक रोकेका बेला काठमाडौँ महानगरपालिकाको नगर प्रहरीले मोटरसाइकलमा ‘ह्वील लक’ गरिदिएपछि उनी आवेशमा आएका हुन सक्ने प्रहरीको प्रारम्भिक अनुसन्धान देखिएको जनाएको छ । 

आज दिउँसो करिब १ः४५ बजे उनले त्रिपुरेश्वरस्थित राहदानी विभागको ३ नम्बर गेट नजिकै उनले आफ्नै शरिरमा आगो लगाएका थिए । 

प्रहरी स्रोतका अनुसार  उनले आफैँले चढेर आएको मोटरसाइकलबाट पेट्रोल निकालेर शरीरमा छर्किएका थिए । 

घटनास्थलमा खटिएका प्रहरी टोलीले तत्कालै आगो निभाएर उनलाई उद्धार गरी उपचारका लागि वीर अस्पताल पुर्‍याएको थियो । हाल उनको वीर अस्पतालको बर्न युनिटमा उपचार भइरहेको छ ।