अब कर्मचारीले सरकारी ड्रेसमा फेसबुक/टिकटक रिल्स बनाउन नपाउने

काठमाडौँ । आजकल बढ्दो सामाजिक सञ्जालको प्रयोगसँगै सरकारी कर्मचारीले कार्यालय पोशाकमा भिडियोहरु बनाएर पोस्ट गर्ने प्रचलन बढ्दो छ । निजामती कर्मचारीहरु कामभन्दा सोसल मिडियातिर ज्यादा इंगेज भएपछि सरकारले कर्मचारीहरुका लागि आचारसंहिता जारी गरेको छ ।

भूमि व्यवस्था, सहकारी, संघीय मामिला तथा सामान्य प्रशासन मन्त्रालयले जारी गरेको अचारसंहितामा भनिएको छ, 'कार्यालयको काममा रहेको समयमा, कार्यालय वा परिसर वा फिल्डमा खटिएको अवस्थामा कार्यालय पोशाकमा कार्यालयसँग सम्बन्धित प्रवर्धनात्मक वा शिक्षामूलक बाहेकका फोटो वा भिडियो सामग्री निर्माण गर्न वा सामाजिक सञ्जालमा राख्न हुँदैन ।'

Watch On

सरकारले सामाजिक सञ्जाल प्रयोग गर्दा पदीय जिम्मेवारी र गरिमा ख्याल गर्नुपर्ने समेत स्पष्ट पारेको छ । 'कार्यालय समय बाहेक फेसबुक, ट्वीटर, ह्वाट्स एप, लिंकड इन, टिकटक जस्ता सामाजिक सञ्जालहरु प्रयोग गर्दा सेवाको मर्यादा र आस्थामा आँच नआउने गरी व्यवसायिक आचारसंहिताको अधिनमा रही उच्चतम सतर्कता अपनाउनु पर्दछ,' भनिएको छ । 

यसैगरी 'सामाजिक सञ्जालको प्रयोग गर्दा सरकारी सेवाको गरिमामा आँच आउने, कर्मचारीको मानमर्दन हुने तथा जनमानसमा भ्रम एवं अविश्वास पैदा हुने, प्रचलित कानुन र व्यवसायिक मर्यादाले अस्वीकार गर्ने किसिमका श्रव्य दृश्य सामग्रीहरु राख्न एवं शेयर गर्नुहुँदैन' भनिएको छ । 

आचारसंहिता पालना गरे नगरेको सुक्ष्म अनुगमन हुने र उल्लंघन गरिए कानुन बमोजिम कारवाही हुने मन्त्रालयले जनाएको छ । 

यसअघि नेपाल प्रहरीले पनि प्रहरी पोशाकमा भिडियो बनाउने र सोसल मिडिया पोस्ट गर्ने अभ्यास बन्द गराउँदै केही प्रहरीलाई विभागीय कारवाहीसमेत गरेर रोकेको थियो । 

आचारसंहितामा कार्यालयमा रहँदा तोकिएको पोशाक र कर्मचारी परिचयपत्र अनिवार्यरुपमा लगाउनुपर्ने पनि भनिएको छ ।