मिडियाका गेटमा गाडीबारे रविको बोली– रास्वपाकै नेता भए पनि कारबाही हुन्छ

काठमाडौँ । राष्ट्रिय स्वतन्त्र पार्टीका सभापति रवि लामिछानेले मिडियाको गेटमा गाडी तेर्स्याउने जो सुकै भए पनि कारबाही हुनुपर्ने बताएका छन् । प्रतिनिधिसभाको बैठकबाट बाहिरिने क्रममा आज सञ्चारकर्मीहरुसँग कुरा गर्दै सभापति लामिछानेले उक्त कार्यमा संलग्न रास्वपाकै नेता भए पनि कारबाही हुनुपर्ने बताएका हुन् ।

सभापति लामिछानेले भने– ‘समग्रमा यो जुन प्रवृत्ति देखियो, यो अस्वाभाविक भएकाले यसप्रति पार्टीले भनेको छ, पार्टी त्यसमा अडिग छ । रास्वपाकै नेता जो भए पनि कारबाही हुनुपर्छ।’

Watch On

उनले यसबारे पार्टीले विज्ञप्तिमार्फ आफ्नो धारणा सार्वजनिक गरिसकेको र त्यसमा पार्टी अडिग रहेको स्पष्ट पारे । ‘पार्टीले भनिसक्यो, हामीले विज्ञप्ति निकालेर भनिसक्यौं, छानबिन हुनुपर्छ कारबाही हुनुपर्छ’ लामिछानेले भने– ‘तत्काललाई के गरियो, त्यो बेग्लै कुरा हो । तर, यो घटनालाई हेर्ने पार्टीको दृष्टिकोण स्पष्ट छ । तत्काललाई छोडियो कि समाइयो कि, के मुद्दा लाग्यो कि, लागेन कि, त्यो बेग्लै कुरा हो । रास्वपा त्यो पार्टी हो, जसले ७२ घण्टाभित्र सांसदलाई कारबाही गर्यो ।’

सत्तारुढ दलका सभापति लामिछानेले प्रधानमन्त्री बालेन शाहसँग समग्र विषयमा छलफल भएको जानकारी दिए ।

‘हामीले सम्पूर्ण विषयमा कुरा गर्यौं, विशेषगरी सुकुम्बासी व्यवस्थापनका विषयमा गम्भीर रुपमा छलफल गरेका छौं, अन्य सबै विषयमा परिणामुखी छलफल गर्यौं’ उनले भने ।