समाज

एमाले उपाध्यक्ष विष्णु पौडेलविरुद्ध मुद्दा दायर, झण्डै २१ करोड बिगो दाबी

सिधाकुरा

शुक्रबार, साउन १, २०८३

एमाले उपाध्यक्ष विष्णु पौडेलविरुद्ध मुद्दा दायर, झण्डै २१ करोड बिगो दाबी

काठमाडौँ । एमाले उपाध्यक्ष एवं पूर्वउपप्रधान तथा अर्थमन्त्री विष्णु पौडेलविरुद्ध २० करोड ९० लाख बिगो दाबीसहित सम्पत्ति शुद्धीकरण कसुरमा मुद्दा दायर भएको छ ।

सम्पत्ति शुद्धीकरण अनुसन्धान विभागको अनुसन्धान प्रतिवेदनकाअनुसार सरकारी वकिल कार्यालयले बिहीबार पौडेललाई बिचौलिया दीपक भट्टको सम्पत्ति शुद्धीकरण सम्बन्धी कसुरमा मतियार ठहर्‍याउँदै विशेष अदालतमा मुद्दा दायर गरेको हो । पौडेलका साथै ६ व्यक्ति र १० कम्पनीविरुद्ध पनि मुद्दा दायर भएको छ ।

Watch On

सम्पत्ति शुद्धीकरण अनुसन्धानका लागि पौडेल ८ असारमा सुर्खेतबाट पक्राउ परेका थिए । उनीविरुद्ध पाँचौँपटकसम्म म्याद थप गर्दै अनुसन्धान गरिएको थियो । अर्थमन्त्री हुँदा बिचौलिया भट्टसँग अनैतिक र गैरकानुनी साँठगाँठ तथा पदीय जिम्मेवारीको दुरुपयोग गरी लाभ दिलाएको र अप्रत्यक्ष रूपमा त्यसको हिस्सा लिएकोलगायत आरोप पौडेलमाथि छ ।

यसअघि बिमा, धितोपत्र, बैंकिङ र सम्पत्ति शुद्धीकरणसम्बन्धी चार मुद्दा खेपेर कारागारमा रहेका भट्टविरुद्ध पनि पूरक अभियोगका रूपमा नयाँ मुद्दा दायर भएको छ । यस मुद्दामा भट्टविरुद्ध ४७ करोड ७७ लाख ६६ हजार २५० बिगो दाबी गरिएको छ ।

प्रकाशित मिति: शुक्रबार, साउन १, २०८३

प्रतिक्रिया दिनुहोस्