पुष्पलाल स्मृति दिवसका दिन नारायणकाजी श्रेष्ठले राखेका दुई प्रस्ताव

काठमाडौं । नेपाली कम्युनिस्ट पार्टी (नेकपा) का नेता नारायणकाजी श्रेष्ठले बामपन्थीहरूलाई पनि एकताबद्ध अगाडि बढाउनु पर्ने बताएका छन् ।  पुष्पलाल स्मृति दिवसका दिन काठमाडौंमा एमाले राजधानी प्रदेश कमिटीले राखेको कार्यक्रममा बोल्दै उनले आफूले तुरुन्तै पार्टी एकता गरिहालौं भनेर नभनेको, त्यसका लागि आधार बनाउनुपर्ने बताएका हुन् ।

‘बामपन्थीहरूलाई एकताबद्ध रूपमा लअगाडि बढाउनु छ। त्यसको मतलब मैले अहिले तुरुन्तै पार्टी एकता गरिहालौँ, त्यो परिस्थिति तयार भइसकेको छ भनेको होइन। तर त्यसलाई केन्द्र मिसनमा नराखिकन हुँदैन। अहिले भने हामीले हाम्रो सहकार्य र कार्यगत एकताको प्रक्रिया अगाडि बढाऊँ । सबै पार्टीहरूले आफ्नोआफ्नो रुपान्तरण र पुनर्गठनको प्रक्रिया अगाडि बढाऊँ,’ उनले भने ।

Watch On

आफ्नोआफ्नो पार्टी रुपान्तरणको प्रक्रिया, पुनर्गठनको प्रक्रिया अगाडि बढाएपछि अहिलेको संविधान, लोकतन्त्र र राष्ट्रिय स्वाधीनताको पक्षमा देशभक्त, लोकतन्त्र पक्षधर र बामपन्थी शक्तिहरूको सहकार्य प्रक्रिया अगाडि बढाउनुपर्ने बताएका थिए । 

‘त्यसपछि रूपान्तरित र पुनर्गठित बामपन्थी शक्तिहरुले एउटै केन्द्र बनाउने दिशातिर अगाडि बढाऊँ । ताकि सिंगो कम्युनिस्ट आन्दोलनको रुपान्तरण र पुनर्गठनप्रति अगाडि बढोस् । र, देशको नेतृत्व गर्न सकियोस् त्यस्तो अवस्थामा यस्तो एकीकृत रुपान्तरित र पुनर्गठित कम्युनिस्ट केन्द्रले नयाँ वैचारिकको आधारमा अगाडि बढ्छ,’ उनले भने ।