मनाङ र दार्चुलाका बिरामी किन पुग्दैनन् कीर्तिपुर जलन उपचार केन्द्र ?

काठमाडौँ । गम्भीर जलनमा पर्दा वा शरीरको कुनै भाग आगोले पोल्दा उपचारका लागि सबैले सम्झने एकमात्र भरपर्दो नाम कीर्तिपुर अस्पताल हो । विशेषतः तेजाब आक्रमणका घटनापछि यो अस्पताल अझ बढी चर्चामा आयो । दुर्गम होस् वा सुगम, आगलागी वा जलनबाट पीडित बिरामीलाई प्राथमिक उपचारपछि यही केन्द्रमा रिफर गर्ने गरिएको छ ।

सबैले यसलाई बर्न अस्पताल नै भनेर  चिन्ने गर्छन् ।

Watch On

अहिलेसम्मको तथ्याङ्क हेर्दा देशका ७७ जिल्लामध्ये दुईवटा बाहेक अन्य सबै क्षेत्रबाट उपचारका लागि बिरामीहरू यहाँ आउने गरेका छन् । ती दुई अछुतो जिल्ला हुन्– एक हिमालपारिको मनाङ र अर्को सुदूरपश्चिमको पहाडी जिल्ला दार्चुला ।

सन् २०१४ यता कीर्तिपुरस्थित जलन उपचार केन्द्रले बिरामीको तथ्याङ्क राख्दै आएको छ । तर गएको १२ वर्षमा यी दुवै जिल्लाबाट एक जना पनि जलनका बिरामी उपचारका लागि यहाँ आइपुगेका छैनन् ।

सन् २०१४ मा ३५ जिल्लाका ९० जना बिरामी उपचारका लागि भर्ना भएका थिए । यो सङ्ख्या सन् २०१५ मा ५४ जिल्लाबाट १ सय ९४ पुग्यो भने सन् २०१६ मा ६१ जिल्लाका ३ सय ७३ बिरामी केन्द्रमा भर्ना भए ।

सन् २०१४ देखि २०२५ सम्म आइपुग्दा उपचारका लागि आउने जिल्लाको सङ्ख्या ७५ पुगेको छ र बिरामीको चाप पनि दिनानुदिन बढ्दो छ । पछिल्लो तीन वर्षको तथ्याङ्क केलाउँदा पनि मनाङ र दार्चुलाका बिरामी यो केन्द्रसम्म आएको अभिलेख छैन । सन् २०२३ मा ७५ जिल्लाबाट ७ सय ९०, सन् २०२४ मा ७ सय ५३ र सन् २०२५ मा ८ सय ७७ जना बिरामी भर्ना भए, तर तिनमा मनाङ र दार्चुलाका कोही थिएनन् ।

अस्पतालका प्लास्टिक सर्जन डा. शङ्कर राई भन्छन्, ‘म स्थापनाकालदेखि यहीँ छु, हजारौंको उपचार गरेँ तर दार्चुला र मनाङको एक जना पनि बिरामी भेट्टाएको छैन।’

उनका अनुसार भौगोलिक विकटताका कारण दार्चुलाका बिरामी काठमाडौँभन्दा नजिक पर्ने भारततिर जाने गरेका हुन सक्छन् भने मनाङको विषयमा उनी अनभिज्ञ छन् । ‘मनाङमा जलन नै नहुने भन्ने त होइन होला, त्यहाँ घटना हुँदा बिरामीले के गर्छन् भन्नेमा अचम्म छौँ,’ उनले भने ।

यसैबीच, एक सय शय्याको कीर्तिपुर अस्पतालले बिरामीको चापलाई मध्यनजर गर्दै हाल क्षमता विस्तार गरी १ सय ३० बेडमार्फत सेवा दिइरहेको छ । जसमा जलन उपचारका लागि मात्रै ३६ वटा विशेष बेड सञ्चालनमा छन् । प्रायः सधैँ यी सबै बेड भरिने गरेका छन् । आपत्कालीन अवस्थामा जटिल बिरामी आएमा सामान्य अवस्थामा फर्किसकेका बिरामीलाई अन्य वार्डमा सार्ने गरिएको अस्पताल प्रशासनले जनाएको छ।