पोखरालाई हराउँदै विराटनगरको प्लेअफ सम्भावना कायमै

काठमाडौँ । नेपाल प्रिमियर लिग (एनपिएल) को तेस्रो संस्करणमा विराटनगर किङ्सले पोखरा एभेन्जर्सलाई चार विकेटले पराजित गरेको छ। जितसँगै विराटनगरको प्लेअफ पुग्ने सम्भावना कायमै रहेको छ भने पोखरा प्रतियोगिताबाट बाहिरिएको छ।

Watch On

कीर्तिपुरस्थित त्रिभुवन अन्तर्राष्ट्रिय क्रिकेट मैदानमा बिहीबार पोखराले दिएको १३३ रनको लक्ष्य विराटनगरले १९.२ ओभरमा ६ विकेट गुमाएर पूरा गर्‍यो।

विराटनगरका लागि बसिर अहमदले सर्वाधिक ३७ र लोकेश बमले ३३ रन बनाए। अविजित रहेका इसुरु उडानाले २५ तथा शेहान जयसूर्याले १७ रन जोडे।

पोखराका कुशल भुर्तेल र रमेश मेन्डिसले दुई–दुई तथा विपिन खत्री र धनञ्जय लक्षणले एक–एक विकेट लिए।

त्यसअघि टस जितेर पहिले ब्याटिङ गरेको पोखरा १७.५ ओभरमा १३२ रनमा अलआउट भएको थियो। पोखराका ओपनर युवराज सम्राले ४७ बलमा सात चौका र पाँच छक्काको मद्दतले ८४ रन बनाए पनि अन्य ब्याटरले उल्लेख्य योगदान दिन सकेनन्।

धनञ्जय लक्षणले २२ र सनि बिकेले १२ रन बनाए। अन्य ब्याटरले दोहोरो अङ्कमा रन बनाउन सकेनन्।

विराटनगरका कप्तान सन्दीप लामिछानेले उत्कृष्ट बलिङ गर्दै चार ओभरमा २७ रन खर्चेर छ विकेट लिए। उनले यस क्रममा ह्याट्रिकसमेत पूरा गरे। एन्जेलो म्याथ्युज, चरिथ असलङ्का र रुपेश सिंहले एक–एक विकेट लिए।

छ खेल खेलेको विराटनगरको यो तेस्रो जित हो। तीन खेलमा पराजित भएको विराटनगर छ अङ्कसहित प्लेअफ दौडमा कायम छ।

यता पोखराले छ खेलमध्ये पाँचमा हार र एकमा मात्र जित निकालेको छ। यो हारसँगै पोखरा प्लेअफ दौडबाट बाहिरिएको छ।

आजै हुने अर्को खेलमा कर्णाली याक्स र लुम्बिनी लायन्स भिड्दैछन्। कीर्तिपुरस्थित त्रिवि क्रिकेट मैदानमा हुने खेल साँझ ५ बजे सुरु हुनेछ।