कप्तानगञ्ज घटनाप्रति सांसद लालविक्रमले भने– गोली चलाउनुपर्ने परिस्थिति नै थिएन

काठमाडौं । सुनसरीको देवानगञ्ज गाउँपालिका–३ कप्तानगञ्जमा दुई समूहबीचको विवाद नियन्त्रणका क्रममा प्रहरीको गोली लागेर एक व्यक्तिको मृत्यु भएको घटनाप्रति सुनसरी–२ का प्रतिनिधिसभा सदस्य लालविक्रम थापाले गम्भीर आपत्ति जनाएका छन् । घटनालाई अत्यन्तै गम्भीर र खेदजनक संज्ञा दिँदै उनले यसबारे निष्पक्ष छानबिनको माग गरेका छन् ।

घटनास्थलमै पुगेर सुरक्षा निकायसँग छलफल गरेका सांसद थापाले नागरिकमाथि यसरी गोली चलाउनुपर्ने कुनै पनि परिस्थिति नरहेको दाबी गरे । ‘कुनै पनि हालतमा कहीँ पनि गोली चलाउनुपर्ने कन्डिसन छँदैछैन यो घटनामा,’ उनले भने, ‘हातमा हतियार छ भन्दैमा नागरिकमाथि गोली चलाउने काम स्वीकार्य हुन सक्दैन ।’

Watch On

सांसद थापाले घटनाका बेला स्थानीय प्रशासन र सुरक्षा निकायबीच समन्वयको अभाव देखिएको आशंका व्यक्त गरे । जिल्ला प्रमुख अधिकारी (सीडीओ) लाई सोध्दा पनि आफूलाई जानकारी नभएको बताएको र प्रहरी उपरीक्षक (एसपी) ले फोन नउठाएको उनको गुनासो छ । घटनाबारे प्रारम्भिक विवरण बुझ्न रातिसम्म घटनास्थलमै रहेका थापाले सुरक्षा अधिकारीहरूबाट समेत स्पष्ट जानकारी पाउन नसकेको बताए ।

घटनास्थलमा अन्य कुनै घाइते लुकेर बसेका वा उपचार नपाएर अलपत्र परेका छन् कि भनेर पुनः खोजी गर्न उनले प्रशासनलाई आग्रह गरेका छन् । घाइतेहरूको उपचारलाई पहिलो प्राथमिकता दिनुपर्ने उल्लेख गर्दै उनले आवश्यकता परे काठमाडौंसम्म उपचारको व्यवस्था मिलाउन पहल गर्ने प्रतिबद्धता जनाएका छन् ।

नयाँ सरकार बनेको बेला यस्ता घटनाले देशभर नकारात्मक सन्देश जाने भएकाले अधिकतम संयमता अपनाउन सुरक्षा निकाय र स्थानीय बासिन्दालाई उनले आग्रह गरेका छन् । धार्मिक विवादका कारण परिस्थिति थप बिग्रिन नदिन सबै पक्ष गम्भीर हुनुपर्ने उनको जोड छ ।

गत राति देवानगञ्ज–३ कप्तानगञ्जमा दुई समूहबीच उत्पन्न विवाद नियन्त्रणमा लिने क्रममा प्रहरीले चलाएको गोली लागेर एक जनाको मृत्यु भएको थियो । त्यस, पश्चात उत्पन्न तनावलाई नियन्त्रणमा लिन स्थानीय प्रशासनले उक्त क्षेत्रमा अनिश्चितकालीन कफ्र्यु आदेश जारी गरेको छ भने प्रहरीले घटनाबारे थप अनुसन्धान भइरहेको जनाएको छ ।