सुनसरी घटनाबारे क्याबिनेटमा छलफल, गृहमन्त्री गुरुङले गरे ब्रिफिङ

काठमाडौँ । सुनसरीको कप्तानगन्जमा भएको हिंसात्मक घटनाबारे मन्त्रिपरिषदमा छलफल भएको छ ।

बुधबार बसेको मन्त्रिपरिषद् बैठकमा गृहमन्त्री सुधन गुरुङले घटनाबारे ब्रिफिङ गर्दै उच्च निगरानी भइरहेको जानकारी गराएको एक मन्त्रीले बताए ।

Watch On

उनकाअनुसार कप्तानगन्जको स्थिति विस्तारै नियन्त्रणमा आइरहेको र सामान्य बन्दै गइरहेको भनाइ गृहमन्त्री गुरुङको थियो । गुरुङले घटनास्थलमा छानबिन समिति पठाएर सुक्ष्म अनुसन्धान भइरहेको भन्दै घटनाको जरोसम्म पुगेर दोषीलाई कारवाही गरिने र दिर्घकालीन समाधानको उपाय खोजिने पनि जानकारी गराएका थिए । बैठकमा मन्त्रीहरुले घटनाबारे जिज्ञासा राखेका थिए । प्रधानमन्त्री बालेन्द्र शाहले घटना विवरण सुनेर बसेका थिए । लगत्तै प्रहरी प्रमुख बोलाएर ब्रिफिङ लिएका थिए । 

क्याविनेटमा ब्रिफिङ गरेका गृहमन्त्री गुरुङले लगत्तै छानबिन गर्न गठित समितिमा दुई सदस्य थप गरेका छन् । सचिवस्तरीय निर्णय गराउँदै गुरुङले समितिमा ब्यालिस्टिक र फरेन्सिक हेर्ने गरी प्रहरी निरीक्षक दिपेश अवस्थी र प्रहरी उपरीक्षक मोहनसिंह धामीलाई सदस्यका रुपमा नियुक्त गरी फिल्डमा खटाएका हुन् ।

समितिलाई घटनाको प्रतिवेदन यथाशीघ्र बुझाउन निर्देशन समेत दिइएको छ । आइतबार राति सुनसरीको देवानगञ्जमा दुई समूहबीच भएको झडपका सम्बन्धमा छानबिन गर्न गत सोमबार गृह मन्त्रालयका सहसचिव भुपेन्द्र थापाको संयोजकत्वमा ५ सदस्यीय समिति गठन गरिएको थियो । 

मन्त्रालयले सुनसरीलगायतका अन्य जिल्लामा सोही प्रकृतिको घटना घट्न नदिनका लागि पूर्वतयारी समेत सुरु गरेको छ । यसका लागि मन्त्रालयले बाँके, कपिलवस्तु, धनुषा, सिरहा, सप्तरीलगायतका जिल्लामा शान्ति, सुव्यवस्था र आपसी सद्भाव कायम राख्न प्रमुख जिल्ला अधिकारीमार्फत आवश्यक समन्वय गरिरहेको छ । 

मन्त्रालयले उक्त क्षेत्रमा सुरक्षा अनुगमन र समन्वयलाई तीव्र पारेको छ । मन्त्रालयमा आज गृहमन्त्रीसहित सचिव र सुरक्षा निकायका प्रमुखहरूको उपस्थितिमा जिल्लागत सुरक्षा अवस्थाबारे पनि गम्भीर समीक्षा गरिएको छ ।  

मन्त्रालयले वार्ताको माध्यमबाट सुनसरीको समस्या समाधान गर्न पहल गरिरहेको र हाल सुनसरीको देवानगञ्जलगायत अन्य संवेदनशील क्षेत्रमा अवस्था सामान्य बन्दै गएको जनाएको छ ।