किरण थापालाई बागमतीमा संसदीय दलको नेता बनाउन महेश बस्नेतले डाके गोप्य भेला

काठमाडौं । नेकपा एमालेका सचिव महेश बस्नेतले बागमती प्रदेश संसदीय दलको नेता फेर्न गोप्य भेला डाकेका छन् ।

बस्नेतले किरण थापामगरलाई प्रदेश सभा दलको नेता बनाउन भन्दै भक्तपुर गठ्ठाघरस्थित जर्मन हाउसमा शुक्रबार बिहान ९ बजे गोप्य भेला बोलाएको एक सांसदले बताए ।

Watch On

‘किरण थापामगरको पक्षमा बहुमत जुटाउन महेश बस्नेत समूहले जर्मन हाउसमा भेला डाकेर सांसदहरूको हस्ताक्षर गराइरहेका छन् भन्ने सुनेका छौं,’ इतरसमूहका एक नेताले सिधाकुरासँग भने ।

उनकाअनुसार सांसदहरूले आर्थिक चलखेलसमेतको आशंका गरेका छन् । बागमती प्रदेशमा एमालेका २५ सांसद छन् । थापाको पक्षमा बहुमत जुटाउन १३ सांसद आवश्यक पर्छ ।

पार्टी अध्यक्ष केपी शर्मा ओलीले पनि बागमती प्रदेशमा किरण थापामगरलाई मुख्यमन्त्री बनाउन चाहेको एमाले नेताहरूले बताएका छन् । नेताहरुकाअनुसार ओलीले पनि सांसदहरुलाई बोलाएर थापाको पक्षमा उभिन फकाइरहेका छन् । 

ओलीले बागमतीमा थापालाई मुख्यमन्त्री बनाउने तथा लुम्बिनीमा चेतनारायण आचार्य र कोशीमा हिक्मत कार्कीलाई नै निरन्तरता दिनेमा नेताहरूसँग सहमति जुटाएको एक नेताले बताए । ती नेताका अनुसार बिहीबार बिहान अध्यक्ष केपी शर्मा ओलीले उपाध्यक्षद्वय रामबहादुर थापा ‘बादल’, विष्णु पौडेल र महासचिव शंकर पोखरेललाई छलफलका लागि भक्तपुर गुण्डुस्थित आफ्नो निवास बोलाएका थिए ।

बिहान ११ बजेदेखि भएको छलफल अपराह्नमात्रै टुंगिएको थियो । ‘उक्त छलफलमा कोशी र लुम्बिनीमा पुरानै मुख्यमन्त्री दोहोरिने सहमति भएको छ । त्यहाँ अहिले नफेर्ने तर बागमतीमा भने अहिले दलका नेता रहेका जेन थपलिया (जगन्नाथ) लाई नबनाउन ओलीले जोडबल गरिरहेका छन्,’ ती नेताले भने ।

ती नेताले बताएअनुसार बागमतीको मुख्यमन्त्री बनाउन सचिव महेश बस्नेत लगायत नेताले किरण थापामगरलाई अघि सारेका हुन् । उनी केही समयअघिसम्म सामाजिक विकास मन्त्री थिए । सत्ता समीकरण हेरफेर हुने सहमतिपछि पदबाट राजीनामा दिएका हुन् ।

जेनजी आन्दोलनपछि अध्यक्ष ओलीलाई गुण्डुमा बासको प्रबन्ध गरेका थापा राप्रपाबाट एमाले प्रवेश गरी चुनाव जितेका हुन् ।

‘जेएन लामो समयदेखि आन्दोलनमा जोडिएको मान्छे, उहाँ फेरि ओली कित्ताकै मान्छे हो । पछिल्लो समय नजिक भएको, अहिलेको अस्थायी बासको प्रबन्धदेखि ओली कुटी बनाउनसम्म भूमिका खेले भन्दैमा किरणलाई अघि सार्न नहुने पोखरेल र पौडेलको जोडबल छ । तर ओली सहमत हुनुहुन्न,’ ती नेताले भने ।

बागमतीमा एमाले र नेपाली कम्युनिस्ट पार्टी (नेकपा) को बहुमत छैन । राष्ट्रिय प्रजातन्त्र पार्टी (राप्रपा)लाई विश्वासमा लिएर एमाले नेतृत्वमा सरकार बनाउने कसरत भइरहेको सांसद केशवप्रसाद पोखरेलले जानकारी दिए ।

उनका अनुसार राप्रपा सहमत देखिएको छ । ‘उसका केही कुरा मानेर अहिले सरकार गठन गर्ने तयारी छ,’ उनले भने । मुख्यमन्त्रीमा पोखरेलको पनि दाबी छ ।

११० सदस्यीय प्रदेश सभामा हाल १०४ कायम छन् । सरकार बनाउन ५३ जना सांसद आवश्यक पर्छ । प्रदेश सभाको दोस्रो ठूलो दल नेकपासँग २६ सांसद छन् । एमालेसँग २५ सांसद छन् ।

काठमाडौं ९(२) बाट निर्वाचित प्रदेश सभा सदस्य पोखरेलका अनुसार सरकार गठनका लागि गठबन्धनको मत नपुग्ने भएपछि राष्ट्रिय प्रजातन्त्र पार्टीसँग छलफल भइरहेको छ । राप्रपासँग १२ सांसद छन् ।