सुरु भयो अर्थमन्त्री वाग्लेसँग २० ठूला बहुराष्ट्रिय कम्पनीका प्रतिनिधिको छलफल

काठमाडौं । अर्थमन्त्री डा. स्वर्णिम वाग्लेले आह्वान गरेको नेपालमा लगानी गरेका २० ठूला करदाता बहुराष्ट्रिय कम्पनीका प्रतिनिधिसँगको छलफल सुरु भएको छ।

आर्थिक वर्ष २०८३/८४ को बजेट कार्यान्वयनसम्बन्धी छलफल शृङ्खलाअन्तर्गत अर्थ मन्त्रालयको सुवर्ण हलमा छलफल भइरहेको हो। छलफलमा सूर्य नेपाल, एनसेल आजियाटा, आरती स्ट्राइप्स, गोर्खा ब्रुअरी, हिमालय एअरलाइन्स, होङ्शी शिवम् सिमेन्ट, डुसान, डाबर नेपाल, बोटलर्स नेपाल, युनिलिभर नेपाल, एशियन पेन्ट्स, पावर कन्स्ट्रक्सन कर्पोरेसन अफ चाइना, गोर्खा लाहारी, ह्वासिन सिमेन्ट नारायणी, न्यू होप एग्रो बिजनेस, नेपाल बेलहोप एग्रिटेक, वरुण बेभरेज, टर्किस एयरलाइन्स, भोटेकोशी पावर र बर्जर जेन्सन एन्ड निकोल्सनका प्रतिनिधि सहभागी छन्।

Watch On

छलफलमा कम्पनीका उच्चपदस्थ स्वदेशी तथा विदेशी प्रतिनिधिहरूले सहभागिता जनाएका छन्।

अर्थमन्त्री वाग्लेले बजेटले दिएका सुविधा, लगानीका क्रममा कम्पनीहरूले भोगिरहेका समस्या, थप लगानी विस्तार, रोजगारी सिर्जना तथा लगानीको प्रतिफल फिर्ता लैजान सरकारले गर्नुपर्ने सहजीकरणबारे प्रतिनिधिहरूसँग छलफल गरिरहेका छन् ।

कम्पनीका प्रतिनिधिलाई आफ्ना समस्या, सुझाव तथा सरकारले गर्नुपर्ने सहजीकरणबारे खुलस्त धारणा राख्नुका साथै लिखित विवरणसमेत पेस गर्न आग्रह गरिएको छ ।

यसअघि यही शृङ्खलाअन्तर्गत अर्थमन्त्री वाग्लेले नेपालमा उत्पादनमूलक उद्योग सञ्चालन गरी रोजगारी सिर्जना गरेका तथा अर्थतन्त्रमा योगदान पुर्‍याएका ३३ औद्योगिक घरानाका प्रतिनिधिसँग छलफल गरिसकेका छन् ।

यस्तै, उनले ‘क’ वर्गका वाणिज्य बैंकका प्रमुख कार्यकारी अधिकृत तथा नेपाल राष्ट्र बैंकका कार्यकारी निर्देशकहरूसँग समेत बजेट कार्यान्वयन र आर्थिक गतिविधिका विषयमा छलफल गरिसकेका छन् ।