मानव बेचबिखन रोक्न सचेतक परियारको आग्रह

काठमाडौँ। राष्ट्रिय स्वतन्त्र पार्टी (रास्वपा) का सचेतक प्रकाशचन्द्र परियारले नेपालबाट मानव बेचबिखनका घटना रोक्नुको साटो यसको स्वरूप झन् विस्तार हुँदै गएको भन्दै सरकारको ध्यानाकर्षण गराएका छन्।

प्रतिनिधिसभाको सोमबारको बैठकमा बोल्दै परियारले मानव बेचबिखनजस्तो अमानवीय र राष्ट्रिय लज्जाको विषयलाई सरकारले तत्काल सम्बोधन गर्नुपर्ने बताए। विभिन्न प्रतिवेदनअनुसार प्रत्येक वर्ष १५ हजारभन्दा बढी नेपाली महिला, बालबालिका र युवा बेचबिखन तथा आधुनिक दासताको सिकार भइरहेको भन्दै उनले सरकार गम्भीर बन्नुपर्नेमा जोड दिए।

Watch On

“हिजोसम्म भारतका कोठीमा सीमित यो अपराध आज वैदेशिक रोजगारी, अध्ययन भिसा र सामाजिक सञ्जालको दुरुपयोग गर्दै खाडी, अफ्रिका र एसियाका साइबर स्क्याम सेन्टरसम्म फैलिएको छ,” उनले भने, “यो अपराधको स्वरूप परिवर्तन हाम्रो सुरक्षा प्रणालीका लागि ठूलो चुनौती पनि हो।”

गरिबी, बेरोजगारी, आवश्यक सूचनाको कमी, खुला सिमाना, फितलो अनुगमन, दलालको बदलिँदो शैली र पहुँचका आधारमा अपराधीलाई संरक्षण दिने प्रवृत्तिका कारण मानव बेचबिखनमा कमी आउन नसकेको परियारले बताए।

उनले मानव बेचबिखन नियन्त्रणका लागि सिमानामा कडाइ गर्न, पीडितलाई छिटो न्याय र क्षतिपूर्ति उपलब्ध गराउन तथा दलाललाई कानुनी कारबाहीको दायरामा ल्याउन सरकारसँग आग्रह गरे।

त्यस्तै, मानव बेचबिखनमा संलग्न मुलुकमा कूटनीतिक पहल बढाउन र श्रम गन्तव्य मुलुकसँग आवश्यक सम्झौता गरी उद्धार संयन्त्रलाई बलियो बनाउनुपर्ने उनको सुझाव छ।

स्वदेशमै मर्यादित रोजगारी सिर्जना गर्नुका साथै उद्धार गरिएका पीडितको दीर्घकालीन पुनःस्थापना गर्न सके मानव बेचबिखन नियन्त्रणको दिगो समाधान निकाल्न सकिने परियारले बताए।