किशोर श्रेष्ठविरुद्ध उपसभामुख रुवी कुमारीले दिइन् जाहेरी

काठमाडौँ । प्रतिनिधिसभाकी उपसभामुख रुवी कुमारी ठाकुरले जनआस्था र किशोर श्रेष्ठविरुद्ध जाहेरी दिएकी छन् । उनले सोमबार जिल्ला प्रहरी परिसर ललितपुरमा जाहेरी दर्ता गराएकी हुन् । 

जाहेरीमा उपसभामुख ठाकुरले किशोर श्रेष्ठ सम्पादक तथा सञ्चालक रहेको सामाजिक सञ्जाल फेसबुक पेज जनआस्थामा आफ्नो मर्यादा र संवैधानिक ओजलाई धमिल्याउने तथा व्यक्तिगत चरित्र र प्रतिष्ठामा गम्भीर र अपूरणीय क्षति पुर्याउने नियतले अत्यन्तै भ्रामक, असत्य, अनर्गल र निन्दनीय समाचार समप्रेषण गरेको उल्लेख गरेकी छिन् । 

Watch On

उपसभामुख ठाकुरले श्रेष्ठविरूद्ध विद्युतीय कसुर ऐन २०६३ अनुसारको कसुरमा अनुसन्धान गर्नुपर्ने माग गरेकी छिन् । 

जनआस्थाका अध्यक्ष श्रेष्ठलाई रिहा गर्न  आजै सर्वोच्च अदालतले परमादेश जारी गरेको छ । श्रेष्ठकी पत्नी सरस्वती श्रेष्ठले दायर गरेको बन्दी प्रत्यक्षीकरणको रिटमा सुनुवाइ गर्दै सर्वोच्चले परामादेश जारी गरेको हो । 

सर्वोच्चका न्यायाधीशद्वय नहकुल सुवेदी र बालकृष्ण ढकालको इजलासले श्रेष्ठलाई हाजिरी जमानीमा छाड्ने वा तारिखमा राखेर अनुसन्धान गर्न परमादेश दिएको हो । 

श्रेष्ठ साउन २७ गते बुधबार ललितपुरबाट पक्राउ परेका थिए । उनलाई व्यक्तिगत गोपनियतामा सम्बन्धी कसुर गरेको आरोपमा पक्राउ गरिएको थियो । यसअघि जिल्ला अदालतले ३ दिन म्याद थप गरेको थियो भने आज पनि काठमाडौँ जिल्ला अदालतले ४ दिन म्याद गरेको थियो । 

तर बन्दी प्रत्यक्षीकरणको रिटमा सुनुवाइ गर्ने सर्वोच्चले रिहा गर्न भनेको हो । साथै श्रेष्ठको संस्था तथा घरबाट बरामद गरिएका डिभाइस पनि फिर्ता गर्न भनिएको छ ।