सभामुख र उपसभामुखको भूमिकामाथि शंकर पोखरेलको प्रश्न

काठमाडौं । नेकपा (एमाले) का महासचिव शंकर पोखरेलले निर्वाचित भएपछि सभामुख र उपसभामुखले तटस्थ भूमिका निर्वाह गर्नुपर्ने बताएका छन् ।

सामाजिक सञ्जालमार्फत धारणा सार्वजनिक गर्दै पोखरेलले संविधानले सभामुख र उपसभामुख फरक दलबाट हुनुपर्ने स्पष्ट व्यवस्था गरेको उल्लेख गरेका छन् । सभामुखको भूमिकाका विषयमा यसअघि पनि प्रश्न उठेको भन्दै उनले पछिल्लो समय सभामुखले आफ्नो भूमिकामा सुधार गर्न खोजेको देखिएको बताएका छन् ।

Watch On

तर उपसभामुखको भूमिकामा समेत समस्या देखिएको पोखरेलको टिप्पणी छ । उनले उपसभामुख राष्ट्रिय श्रम संस्कृति पार्टीबाट समानुपातिक कोटामा निर्वाचित सांसद रहेको उल्लेख गर्दै पदमा निर्वाचित भएपछि दलगत आबद्धताभन्दा माथि उठेर निष्पक्ष भूमिका निर्वाह गर्नुपर्ने बताएका छन् ।

‘उपसभामुखले आफ्नो दलप्रति निरपेक्ष हुने नाममा सत्तापक्षको पक्षपोषण गर्नु संवैधानिक व्यवस्था र संसदीय प्रणालीको मर्ममाथिकै प्रहार हो,’ पोखरेलले भनेका छन् ।

उनले पदीय मर्यादा र संविधानको भावनाअनुसार उपसभामुखको आचरणमा अझै सुधार आवश्यक रहेको बताएका छन् । अनुभवको कमीका कारण यस्तो अवस्था आएको हुन सक्ने भन्दै पोखरेलले उपसभामुखको भूमिकामा सुधार आउनुपर्ने धारणा राखेका छन् ।

‘पदीय मर्यादा र संविधानको भावना अनुरुपको आचरणमा उपसभामुखको ध्यान अनुभवको कमीले हुनसक्छ, पुगेको देखिँदैन । यस विषयमा उहाँमा पनि सुधार आउनु जरुरी देखिन्छ,’ उनले उल्लेख गरेका छन् ।