जुरीखेत स्कारपियो दुर्घटनामा एक जनाको मृत्यु, यी हुन् पाँच घाइते

हेटौँडा  । मकवानपुरको भीमफेदी गाउँपालिका–६ जुरीखेतमा स्कारपियो दुर्घटना हुँदा एक जनाको मृत्यु भएको छ भने उच्च अदालत जनकपुर, अस्थायी इजलास वीरगञ्जका मुख्य न्यायाधीशसहित पाँच जना घाइते भएका छन् ।

काठमाडौंबाट वीरगञ्जतर्फ जाँदै गरेको प्रदेश ३–०१–००२ झ ५१८३ नम्बरको स्कारपियो मंगलबार बिहान करिब ७ बजे अनियन्त्रित भई सडकबाट करिब ५०/६० मिटर तल खोल्सामा खसेर दुर्घटना भएको हो ।

Watch On

दुर्घटनामा स्कारपियोमा सवार सबै छ जना घाइते भएका थिए । उनीहरूलाई उद्धार गरी भीमफेदी अस्पताल पुर्‍याइएको थियो । त्यहाँबाट चालक छुनिलाल चौधरी र रजिष्ट्रार तारादत्त बडुलाई बिहान ९ बजे थप उपचारका लागि हेटौँडा अस्पताल पठाइएको थियो ।

बाँकी चार जनालाई नेपाली सेनाको हेडक्वार्टरमार्फत बिहान ९ः१५ बजे उपचारका लागि काठमाडौंस्थित छाउनी अस्पताल पठाइएको थियो । छाउनी अस्पतालमा उपचाररत ४९ वर्षीया लक्ष्मी बडुको बिहान १०ः२९ बजे उपचारका क्रममा मृत्यु भएको हो ।

दुर्घटनामा उच्च अदालत जनकपुर, अस्थायी इजलास वीरगञ्जका मुख्य न्यायाधीश ५७ वर्षीय गोकर्ण डाँगी घाइते भएका छन् । उनको अवस्था मध्यम रहेको र छाउनी अस्पताल काठमाडौंमा उपचार भइरहेको छ ।

त्यस्तै रजिष्ट्रार ५१ वर्षीय तारादत्त बडुको अवस्था मध्यम रहेको छ । उनको हेटौँडा अस्पतालमा उपचार भइरहेको छ । बडुकी श्रीमती लक्ष्मीको उपचारका क्रममा मृत्यु भएको हो ।

बडुका २५ वर्षीय छोरा रितेन्द्र बडुको अवस्था मध्यम रहेको छ भने ३१ वर्षीया छोरी रिताको अवस्था गम्भीर रहेको प्रहरीले जनाएको छ । दुवैको छाउनी अस्पतालमा उपचार भइरहेको छ ।

स्कर्पियो चालक दाङको राप्ती नगरपालिका–८ का ३२ वर्षीय छुनिलाल चौधरीको अवस्था पनि मध्यम रहेको छ । उनको हेटौँडा अस्पतालमा उपचार भइरहेको छ ।

दुर्घटनामा परेको स्कारपियो घटनास्थलमै रहेको र सडकमा यातायात भने सुचारु रहेको प्रहरीले जनाएको छ । दुर्घटनाको कारणबारे थप अनुसन्धान भइरहेको छ ।