बागमतीको मुख्यमन्त्रीमा किरण थापालाई अघि सार्ने एमालेको निर्णय

काठमाडौं । नेकपा एमालेले बागमती प्रदेश सरकारको मुख्यमन्त्रीमा प्रदेशसभा सदस्य किरण थापालाई अघि सार्ने निर्णय गरेको छ ।

केहीबेरअघि बसेको एमाले संसदीय दलको बैठकले थापालाई मुख्यमन्त्री बनाउने निर्णय गरेको प्रदेश सभा सदस्य केशपप्रसाद पोखरेलले जानकारी दिए ।
‘बिहान ११ बजे भने पनि केही ढिला बैठक बस्यो । बैठकले दल नेतामा जगन्नाथ थपलियालाई नै निरन्तरता दिने र मुख्यमन्त्रीमा किरण माननीयलाई अघि सार्ने निर्णय गरेको छ,’ उनले भने ।

Watch On

बागमतीको मुख्यमन्त्रीका लागि एमालेभित्रै नेताहरूबीच तीव्र प्रतिस्पर्धा र विवाद भइरहेका बेला संसदीय दलको बैठकले थापाको नाम टुंगो लगाएको हो । एमाले र नेपाली कम्युनिष्ट पार्टी (नेकपा) बीच नयाँ सत्ता समीकरण बनेसँगै प्रदेश सरकारको भागबण्डामा बागमतीको नेतृत्व एमालेको भागमा परेको थियो ।

मुख्यमन्त्री आफ्नो भागमा परेपछि एमालेभित्र कसलाई सरकारको नेतृत्वमा पठाउने भन्ने विषयमा थपलिया र थापाबीच प्रतिस्पर्धा चलेको थियो । विवाद बढेपछि पार्टी अध्यक्ष केपी शर्मा ओलीले समेत नेताहरूसँग निरन्तर छलफल गरेका थिए ।

भक्तपुरबाट निर्वाचित प्रदेशसभा सदस्य थापालाई मुख्यमन्त्रीमा अघि सारिएसँगै अन्य दलसँग सरकार गठनका लागि आवश्यक समर्थन जुटाउन वार्ता गर्ने जिम्मेवारीसमेत दिइएको छ ।

थापाको संयोजकत्वमा अन्य दलसँग वार्ता गर्न पाँच सदस्यीय समिति गठन गरिएको छ । समितिमा थापासहित भरतबहादुर केसी, केशव पोखरेल, भारती पाठक र डा. दिनेशचन्द्र देवकोटा रहेका छन् ।

१०४ सदस्यीय बागमती प्रदेशसभामा सरकार गठनका लागि ५३ सांसदको समर्थन आवश्यक पर्छ ।
प्रदेशसभामा नेपाली कांग्रेस ३६ सिटसहित सबैभन्दा ठूलो दल छ । नेपाली कम्युनिष्ट पार्टी (नेकपा) का २६ र एमालेका २५ सांसद छन् । त्यस्तै राष्ट्रिय प्रजातन्त्र पार्टी (राप्रपा)का १२, नेपाल मजदुर किसान पार्टीका ३ र हाम्रो नेपाली पार्टीका २ सांसद छन् ।

एमाले र नेकपा मिल्दा ५१ सांसद पुग्छन् । सरकार गठनका लागि आवश्यक बहुमतभन्दा दुई सांसद कम हुने भएकाले एमाले–नेकपा गठबन्धनलाई सरकार गठनका लागि साना दलको समर्थन आवश्यक पर्नेछ ।