निर्वाचन सुधारका विषयमा पूर्वआयुक्तसँग आयोगले गर्‍यो छलफल

काठमाडौं। निर्वाचन आयोगले पूर्व प्रमुख निर्वाचन आयुक्त तथा पूर्व निर्वाचन आयुक्तहरूसँग निर्वाचन व्यवस्थापन र सुधारका विषयमा छलफल गरेको छ ।

नवनियुक्त प्रमुख निर्वाचन आयुक्त तथा आयुक्तहरूले पदभार ग्रहण गरेपछि आयोगले अघि बढाएका सुधारका योजनामा पृष्ठपोषण लिने उद्देश्यले मंगलबार छलफल आयोजना गरिएको आयोगले जनाएको छ ।

Watch On

छलफलमा निर्वाचन व्यवस्थापनका कानुनी, प्राविधिक तथा व्यवस्थापकीय पक्षमा आवश्यक सुधारका विषयमा विमर्श भएको थियो ।

पूर्व प्रमुख निर्वाचन आयुक्त तथा आयुक्तहरूले आयोगको नयाँ नेतृत्वलाई शुभकामना दिँदै निर्वाचन व्यवस्थापनमा देखिएका पछिल्ला चुनौती सम्बोधन गर्न विधि र पद्धतिमा समयसापेक्ष सुधार आवश्यक रहेको बताएका थिए ।

उनीहरूले निर्वाचनका सरोकारवालासँग निरन्तर संवाद, सूचना प्रविधिको अधिकतम उपयोग र पारदर्शी कार्यशैलीलाई प्राथमिकता दिँदै आयोगको संस्थागत क्षमता अभिवृद्धि गर्नुपर्नेमा जोड दिएका थिए ।

छलफल समापन गर्दै प्रमुख निर्वाचन आयुक्त दिनेशकुमार थपलियाले स्वच्छ, स्वतन्त्र, निष्पक्ष र विश्वसनीय निर्वाचन सम्पन्न गर्ने संवैधानिक जिम्मेवारी पूरा गर्न आयोग प्रतिबद्ध रहेको बताए ।

उनले निर्वाचन व्यवस्थापनलाई समयअनुकूल बनाउँदै आवश्यक सुधार अघि बढाउने प्रतिबद्धता पनि व्यक्त गरे ।

छलफलमा वर्तमान निर्वाचन आयुक्तहरू डा. जानकी कुमारी तुलाधर, गुरुप्रसाद वाग्ले, डा. राजीव सुब्बा तथा निमित्त सचिव नारायणप्रसाद भट्टराई सहभागी थिए ।

त्यस्तै पूर्व प्रमुख निर्वाचन आयुक्तहरू सूर्यप्रसाद श्रेष्ठ, भोजराज पोखरेल र नीलकण्ठ उप्रेती तथा पूर्व निर्वाचन आयुक्तहरू प्रा. डा. वीरेन्द्रप्रसाद मिश्र, विश्वमान श्रेष्ठ, जयराम सिंह बोहरा, नरेन्द्र दाहाल र सुधीरकुमार शाहको सहभागिता थियो ।