रास्वपाले केन्द्रीय सदस्यदेखि विभागीय प्रमुखसम्म मनोनयन गर्दै

काठमाडौं । राष्ट्रिय स्वतन्त्र पार्टी (रास्वपा)ले केन्द्रीय समिति बैठकमा विभिन्न सांगठनिक पदमा मनोनयनदेखि स्थानीय निर्वाचनका लागि उम्मेदवार छनोटको रूपरेखासम्मका विषयमा छलफल गर्ने भएको छ ।

पार्टी सभापतिको निर्देशनअनुसार भदौ ५ गते शुक्रबार बिहान ११ बजे वनस्थलीस्थित घन्टी घर केन्द्रीय कार्यालयमा बस्ने केन्द्रीय समिति बैठकमा विभिन्न सात शीर्षकका एजेन्डा राखिएको छ ।

Watch On

बैठकमा स्थानीय निर्वाचनका लागि ‘उम्मेदवार छनोट रूपरेखा–२०८३’ अनुमोदन गर्ने प्रस्ताव पेस हुने भएको छ । त्यस्तै ‘राइट टु रिकल’ सम्बन्धी दस्तावेज निर्माण गर्ने विषयमा पनि छलफल हुनेछ ।

रास्वपाले आगामी स्थानीय निर्वाचनलाई लक्षित गर्दै संगठनात्मक संरचना विस्तार तथा जिम्मेवारी बाँडफाँटका विषयलाई पनि बैठकको एजेन्डा बनाएको छ ।

बैठकमा केन्द्रीय समिति सदस्य, पदाधिकारी, सचिवालय सदस्य तथा विभागीय प्रमुखहरूको मनोनयनसम्बन्धी प्रस्तावमा छलफल हुने महामन्त्री विपिनकुमार आचार्यले जारी गरेको सूचनामा उल्लेख छ ।

त्यस्तै स्थानीय निर्वाचनका लागि केन्द्रीय उम्मेदवार छनोट समिति सदस्य मनोनयन गर्ने विषय पनि बैठकमा पेस हुनेछ ।

रास्वपाले स्थानीय तहमा ‘उम्मेदवार छनोट रूपरेखा’बारे अभिमुखीकरण तथा प्रशिक्षण कार्यक्रम सञ्चालन गर्ने विषयलाई समेत बैठकको एजेन्डा बनाएको छ । उक्त कार्यक्रम केन्द्रीय समिति तथा प्रतिनिधिसभा सदस्यको नेतृत्वमा सञ्चालन गर्ने प्रस्ताव छ ।

यसैगरी पार्टीको मुखपत्रका रूपमा ‘स्वतन्त्र’ नामक मासिक डिजिटल पत्रिका प्रकाशन गर्ने विषयमा पनि बैठकमा छलफल हुने भएको छ ।

बैठकमा दस्तावेज, सांगठनिक व्यवस्थापन तथा मनोनयन, योजना, कार्यक्रम तथा अभियानसँग सम्बन्धित प्रस्तावमाथि छलफलसँगै विविध विषयमा समेत छलफल हुने रास्वपाले जनाएको छ ।