रास्वपा संसदीय दलमा के के भयो छलफल ?

काठमाडौं । राष्ट्रिय स्वतन्त्र पार्टी (रास्वपा) संसदीय दलको बैठकले विधान संशोधन कार्यदल बनाएको छ ।

बुधबार सिंहदरबारस्थित पार्टी संसदीय दलको कार्यालयमा बसेको बैठकले मुख्य सचेतक कविन्द्र बुर्लाकोटी, सचेतकद्वय क्रान्तिशिखा धिताल र प्रकाशचन्द्र परियार सम्मिलित कार्यदल बनाइएको हो ।

Watch On

संसदीय दलका उपनेता गणेश पराजुलीका अनुसार कार्यदललाई सात दिनको समय दिइएको छ ।

‘संसदीय दलको विधान २०८३ लाई आवश्यकताअनुसार संशोधन गर्न मुख्य सचेतकको संयोजकत्वमा कार्यदल बनाइएको छ र यो कार्यदलले ५ दिनभित्र कार्यविधि तय गर्नेछ’ उनले भने ।

केही सांसदहरूको कार्यशैली, संसदको प्रस्तुतिलगायत विषयमा प्रश्न उठेपछि उनीहरूको आचरणमा कडाइ गर्न लागिएको हो ।

‘दलको विधानमा सांसदहरूको आचरणको विषयलाई पनि समेट्ने गरेर कार्यदलले मस्यौदा तयार पार्नेछ । त्यसपछि दलको बैठक बसेर त्यसलाई अन्तिम रूप दिइनेछ,’ सचेतक क्रान्तिशिखा धितालले भनिन् ।

उनका अनुसार आजको बैठकमा सांसदहरूले मन्त्रीसमक्षा जिज्ञासा राखेका थिए । नागरिकको गुनासो बोकेर मन्त्रालय जाँदा सम्बन्धित विभागीय मन्त्री भेट नभएको, कर्मचारीले सहजीकरण नगरेको, ताकेता गर्दा पनि काम फत्ते नभएकोबारे गुनासो राखेका थिए ।

सांसदहरूले उठाइको विषय सम्बोधन नहुँदा त्यसको असन्तुष्टि संसदमा पुगेको भन्दै दलको बैठक बसेर नियमित छलफल गर्ने निर्णय भएको धितालले बताइन् ।

‘अब नियमित मन्त्रीहरूसँग अन्तक्रिया गरेर कार्यसम्पादनलाई प्रभावकारी बनाउने निर्णय भएको छ,’ उनले भनिन् ।

पार्टी सभापति रवि लामिछानेले पार्टी नेतृत्व र प्रधानमन्त्री बालेन शाहबीच असमझदारी रहेको भन्दै हल्ला चलाइएको भन्दै केही सत्यता नभएको बताएका थिए । 

‘यो भ्रम चिर्न दलका नेता एवं प्रधानमन्त्रीसहितको बैठक राख्नेबारे सभापतिले बताउनुभएको थियो । सरकार र पार्टी नेतृत्वबीच कुनै असमझदारी नरहेको बताउनुभएको थियो,’ उनले भनिन् ।