रामबहादुर थापाले संसदमा राखेका चार विकल्प

काठमाडौं । नेकपा एमालेका संसदीय दलका नेता रामबहादुर थापा ‘बादल’ले वर्तमान राजनीतिक परिस्थितिबाट निकासका लागि प्रतिनिधिसभामा चारवटा विकल्प प्रस्तुत गरेका छन्।

संसद्मा सम्बोधन गर्दै थापाले प्रधानमन्त्री, सभामुख र राष्ट्रिय स्वतन्त्र पार्टीका सभापति रवि लामिछानेले तत्काल चाल्नुपर्ने कदमबारे आफ्नो धारणा राखेका हुन्। उनले अन्तिम विकल्पका रूपमा ठूलो जनआन्दोलन हुन सक्ने चेतावनीसमेत दिएका छन्।

Watch On

१. प्रधानमन्त्रीले के गर्ने ?

थापाले प्रधानमन्त्रीलाई राष्ट्रियता, लोकतन्त्र र जनजीविकाको पुनर्स्थापनाको मार्गमा अविलम्ब फर्किन र संसद्प्रति पूर्णतः उत्तरदायी बन्न आग्रह गरेका छन्।

उनले राज्य आतंक र नागरिक हत्याको जिम्मेवारी प्रधानमन्त्रीले लिनुपर्ने बताएका छन्।

२. सभामुखले के गर्ने ?

सभामुखले जनचाहना कार्यान्वयन गराउन प्रधानमन्त्रीलाई तत्काल रुलिङ गर्नुपर्ने थापाको सुझाव छ।

संसद्को अभिभावकका रूपमा सभामुखले राजनीतिक स्थायित्व कायम गर्न सत्ता र प्रतिपक्षबीच राष्ट्रिय सहमतिको पहल गर्नुपर्ने उनले बताएका छन्।

३. रवि लामिछानेले के गर्ने ?

थापाले राष्ट्रिय स्वतन्त्र पार्टीका सभापति रवि लामिछानेलाई प्रधानमन्त्रीसहित सरकार पुनर्गठनका लागि तत्काल पहल गर्न सुझाव दिएका छन्।

रास्वपा सभापतिको हैसियतमा लामिछानेले वर्तमान राजनीतिक परिस्थितिको निकासका लागि सरकार पुनर्गठनको पहल गर्नुपर्ने उनको भनाइ छ।

४. अन्तिम विकल्प : जनसुनामी

थापाले माथिका विकल्प कार्यान्वयन नभए ठूलो जनआन्दोलन हुन सक्ने चेतावनी दिएका छन्।

‘राष्ट्रियता, लोकतन्त्र र जनजीविका जोगाउन चारै दिशाबाट २००७, २०४६ र २०६२/६३ को भन्दा विशाल र अकल्पनीय जनसुनामी आउनेछ,’ उनले भनेका छन्।

थापाले वर्तमान राजनीतिक संकट समाधानका लागि तत्काल राजनीतिक पहल र राष्ट्रिय सहमति आवश्यक रहेको बताएका छन्।