बागमती मुख्यमन्त्रीमा किरण थापाको दाबी पुग्दैन, प्रदेश प्रमुखले अख्तियारको दुरुपयोग गर्नु हुनेछैन– राप्रपा प्रवक्ता श्रेष्ठ

काठमाडौं । राष्ट्रिय प्रजातन्त्र पार्टी (राप्रपा) प्रवक्ता मोहन श्रेष्ठले बागमती प्रदेश प्रमुखले मुख्यमन्त्री नियुक्तिमा अख्तियारको दुरुपयोग नगर्ने विश्वास व्यक्त गरेका छन् । उनले बागमती मुख्यमन्त्रीमा किरण थापाको दाबीसमेत नपुग्ने बताए ।

नेकपा एमालेका सांसद किरण थापामगरले बुधबार राप्रपासमेतको समेतको समर्थनमा मुख्यमन्त्रीमा दाबी प्रस्तुत गरेका थिए ।

Watch On

राप्रपा दल नेता उद्धव थापाले एमाले सांसद थापालाई समर्थन गरेका थिए ।

संसदीय दल बैठकबिना र केन्द्रको निर्देशनविपरीत थापाले एमालेलाई समर्थन गरेको भन्दै राप्रपाले थापालाई १२ घण्टे स्पष्टीकरण सोधेको छ ।

दलमा अविश्वासको प्रस्ताव दर्ता भएको छ ।

पार्टीभित्र रडाको मच्चिइरहँदा प्रवक्ता मोहन श्रेष्ठले व्यक्तिले दिएको समर्थन दलको हुन नसक्ने बताएका छन् ।

‘व्यक्तिले दिएको समर्थन दलको हुन सक्दैन, बागमती प्रदेशमा १२ सांसद भएको राप्रपाबाट एकजना सांसदले एक्लैले समर्थन दिन सक्दैन र मिल्दा पनि मिल्दैन । एकजनाको मात्र भए पनि समर्थन मान्ने हो भने पनि मुख्यमन्त्रीमा दाबी गर्नेको संख्या पुग्दैन, संख्या नपुगी गरिएको दाबीको अर्थ रहनेछैन,’ उनले भनेका छन् ।

संसदीय दलको नेताको लेटरप्याडमा दिइएको भनिएको समर्थनमा दलकै समर्थन नरहेको उनको दाबी छ ।

‘संसदीय दलको नेताको लेटरप्याडमा दिइएको भनिएको कथित समर्थनमा दलकै समर्थन छैन किनकि समर्थनको एजेण्डामा संसदीय दलको बैठक बसेकै छैन । अनधिकृत हस्ताक्षरलाई मान्यता नदिन पार्टी केन्द्र, पार्टी अध्यक्ष र संसदीय दलको प्रमुख सचेतकले प्रदेश प्रमुखलाई आग्रह गरिसकेको छ । परिपक्व प्रदेश प्रमुखले अख्तियारको दुरुपयोग गर्नुहुने छैन भन्ने विश्वास छ,’ उनले भनेका छन् ।

यसैबीच बागमती प्रदेशमा नयाँ सरकार गठनका लागि सत्ता साझेदार दलहरूबीच मन्त्रालय बाँडफाँट र जिम्मेवारी टुंग्याउने प्रक्रिया अन्तिम चरणमा पुगेको छ । सहमति अनुसार एमालेले मुख्यमन्त्रीसहित दुई मन्त्रालय, नेपाली कम्युनिस्ट पार्टीले दुई र राप्रपाले तीन मन्त्रालय पाउने गरी बाँडफाँट भएको बताइएको छ ।

राप्रपा संसदीय दलका नेता उद्धव थापाले एमालेबाट मुख्यमन्त्री बन्न लागेका किरण थापामगरलाई समर्थन रहेको पत्र प्रदेश प्रमुखसमक्ष पठाएका थिए । तर राप्रपा प्रमुख सचेतक कुमारी तामाङले प्रदेश प्रमुख दीपकप्रसाद देवकोटालाई छुट्टै पत्र पठाउँदै राप्रपाले सरकारलाई दिएको भनिएको समर्थन अनधिकृत रहेको जिकिर गरेकी छन् ।