अख्तियार प्रधानमन्त्री कार्यालयको शाखा होइन, हस्तक्षेप गर्न मिल्दैन : अमरेश सिंह

काठमाडौं । राष्ट्रिय स्वतन्त्र पार्टी (रास्वपा)का सांसद अमरेशकुमार सिंहले अख्तियार दुरुपयोग अनुसन्धान आयोगमाथि राज्यका कुनै पनि निकायले हस्तक्षेप गर्न नहुने बताएका छन्।

बिहीबार सिंहदरबारमा बसेको प्रतिनिधिसभाको राज्य व्यवस्था तथा सुशासन समितिको बैठकमा बोल्दै सिंहले अख्तियार प्रधानमन्त्री कार्यालयको शाखा नभई संवैधानिक निकाय भएकाले त्यसको कामकारबाहीमा हस्तक्षेप गर्न नमिल्ने बताएका हुन्।

Watch On

उनले अख्तियार आफै बिचौलियाहरूको संरक्षण गर्ने केन्द्रजस्तो बनेको आरोपसमेत लगाए। पूर्वगृहसचिवसमेत रहेका अख्तियारका प्रमुख आयुक्तले प्रशासनिक र संवैधानिक पदको पदीय मर्यादा तथा दायित्वबीचको भिन्नता छुट्याउन नसकेको उनको टिप्पणी थियो।

सिंहले विगतमा कर्मचारीहरू कारबाहीबाट जोगिन अख्तियार जाने गरेको भए पनि अहिले अनुचित लाभ लिनका लागि अख्तियार जाने अवस्था बनेको आरोप लगाए।

संविधानले नै अख्तियारलाई भ्रष्टाचार तथा सम्पत्ति छानबिनको अधिकार दिएको अवस्थामा पटक–पटक नयाँ आयोग गठन गर्नुको औचित्यमाथिसमेत उनले प्रश्न उठाए।

राज्यकोषबाट तलब, भत्ता वा पेन्सन लिने मन्त्री, सांसद, मेयर तथा प्रशासक जोसुकैको सम्पत्ति छानबिन गर्ने जिम्मेवारी अख्तियारले प्रभावकारी रूपमा पूरा गर्नुपर्नेमा सिंहले जोड दिए।

बैठकमा सहभागी अन्य सांसदहरूले समेत अख्तियार दुरुपयोग अनुसन्धान आयोगको भूमिका र प्रभावकारितामाथि प्रश्न उठाएका थिए।