हिरासतको बयान सार्वजनिक गर्नु गोपनीयताको हनन् हो : फौजदारी कानुन विज्ञ आचार्य

काठमाडौं । फौजदारी कानुन विज्ञ सुवास आचार्यले प्रहरी हिरासतमा लिइएको बयानको भिडियो सामाजिक सञ्जालमा सार्वजनिक गर्नु कानुनविपरीतको कार्य भएको बताएका छन्।

उनका अनुसार प्रहरीले अपराधमा संलग्न व्यक्तिलाई प्रचलित कानुनबमोजिम कारबाहीको दायरामा ल्याउनुपर्ने भए पनि अनुसन्धान गर्ने निकायले नै कानुनबाहिर गएर काम गर्न मिल्दैन।

Watch On

'प्रहरीले अपराध गर्नेलाई कानुनबमोजिम कारबाहीको दायरामा लिने हो। कारबाही गर्ने हो। तर अनुसन्धान गर्ने निकायले कानुनबाहिरको हरकत गर्न मिल्दैन,' आचार्यले भने।

उनले नेपालको संविधानको धारा २८ मा रहेको गोपनीयताको हक, बालबालिकासम्बन्धी ऐन, २०७५ का दफा २४ र २५, वैयक्तिक गोपनीयतासम्बन्धी ऐन, २०७५ तथा मुलुकी फौजदारी कार्यविधि संहिता, २०७४ ले कानुनी विवादमा परेका बालबालिका तथा थुनुवाको पहिचान, गोपनीयता र निष्पक्ष अनुसन्धानको अधिकार सुनिश्चित गरेको बताए।

'प्रहरी हिरासतको बयान भिडियो खिचेर सामाजिक सञ्जालमा सार्वजनिक गर्नु गोपनीयताको हनन, बाल न्यायको उल्लंघन हो। यो विभागीय आचारसंहिताविपरीतको कार्य पनि हो,' उनले भने।

आचार्यका अनुसार अनुसन्धानका क्रममा संकलित प्रमाण र बयानलाई कानुनी प्रक्रियाअनुसार सुरक्षित राख्नुपर्ने हुन्छ। अनुसन्धान प्रभावित हुने तथा सम्बन्धित व्यक्तिको अधिकारमा असर पर्ने गरी त्यस्ता सामग्री सार्वजनिक गर्नु उचित नहुने उनको भनाइ छ।