समाज

परराष्ट्रमन्त्री खनाल किन जाँदैछन् सर्बिया ?

सिधाकुरा

सोमबार, भदौ ८, २०८३

परराष्ट्रमन्त्री खनाल किन जाँदैछन् सर्बिया ?

काठमाडौँ । परराष्ट्रमन्त्री शिशिर खनाल तीन सदस्यीय नेपाली प्रतिनिधिमण्डलको नेतृत्व गर्दै सर्बिया जाने भएका छन्।

परराष्ट्र मन्त्रालयका अनुसार मन्त्री खनाल यही भदौ १४ गते सर्बियाको राजधानी बेलग्रेड प्रस्थान गर्नेछन्। उनी बेलग्रेडमा भदौ १५ र १६ गते आयोजना हुने असंलग्न आन्दोलन (नाम) को उच्चस्तरीय स्मरणसभामा सहभागी हुनेछन्।

Watch On

सन् १९६१ मा बेलग्रेडमै असंलग्न आन्दोलनको पहिलो शिखर सम्मेलन भएको थियो। त्यसको ६५औँ वार्षिकोत्सवका अवसरमा यस वर्ष बेलग्रेडमा उच्चस्तरीय स्मरणसभा आयोजना गर्न लागिएको हो।

स्मरणसभामा विश्वका विभिन्न देशका नेता, प्रतिनिधिमण्डल तथा असंलग्न आन्दोलनमा सहभागी राष्ट्रका प्रतिनिधिको सहभागिता रहनेछ।

नेपालले आफ्नो परराष्ट्र नीति सञ्चालनको आधारस्तम्भका रूपमा असंलग्नताको सिद्धान्तलाई अङ्गीकार गर्दै आएको छ। असंलग्न आन्दोलनप्रतिको नेपालको प्रतिबद्धतालाई संविधानले समेत प्रमुख नीतिका रूपमा स्वीकार गरेको छ।

नेपालले असंलग्न आन्दोलनको वाङडुङ सम्मेलनदेखि विभिन्न शिखर सम्मेलन, मन्त्रिस्तरीय बैठक तथा अन्य बैठकमा उच्चस्तरीय सहभागिता जनाउँदै आएको छ।

परराष्ट्र मन्त्रालयका अनुसार मन्त्री खनाल भदौ १७ गते सर्बियाबाट नेपाल फर्कने कार्यक्रम रहेको छ।

प्रकाशित मिति: सोमबार, भदौ ८, २०८३

प्रतिक्रिया दिनुहोस्