दुर्गा प्रसाईंको घरबाट के के बरामद गरेको थियो प्रहरीले ?

काठमाडौँ । सर्वोच्च अदालतले मेडिकल व्यवसायी दुर्गा प्रसाईंको घरबाट नियन्त्रणमा लिइएका सामानसहित उपस्थित हुन विपक्षीका नाममा आदेश दिएको छ।

न्यायाधीश नृपध्वज निरौलाको इजलासले भदौ ४ गते प्रसाईंको घरबाट नियन्त्रणमा लिइएका सामानसहित २४ घण्टाभित्र उपस्थित हुन जिल्ला प्रहरी परिसर भक्तपुरलाई आदेश दिएको हो ।

Watch On

आदेशमा भनिएको छ– ‘लिखित जवाफसँगै यही भदौ ४ गते गरिएको घर खानतलासीमा बरामद सामग्री पेस गर्न जिल्ला प्रहरी परिसर भक्तपुरका नाममा आदेश जारी गरिएको छ । मागबमोजिम आदेश जारी हुन नपर्ने भए सोको आधार र कारण खुलाई यो आदेश प्राप्त भएका मितिले बाटाका म्यादबाहेक २४ (चौबिस) घण्टाभित्र महान्यायाधिवक्ताको कार्यालयमार्फत लिखित जवाफ पेस गर्नू, साथै, निवेदनसाथ संलग्न मिति २०८३ ।०५।०४ को खानतलासी पूर्जीमोजिम निवेदक दुर्गा प्रसाईंको घर खानतलासी हुँदा बरामद भएका भनिएका सामान समेत पेसीको दिन लिई आउनू भनी विपक्षी जिल्ला प्रहरी परिसर भक्तपुरलाई लेखी पठाउनू ।’

भदौ ४ गते प्रहरी परिसर भक्तपुर र काठमाडौं उपत्यका अपराध अनुसन्धान कार्यालयको टोलीले प्रसाईंको घरबाट ६ वटा मोबाइल, एउटा ल्यापटप र सिसिटिभीको रेकर्डर रहने डिभाइस नियन्त्रणमा लिएको थियो।

उनलाई पक्राउ गरेपछि प्रसाईंकी पत्नी उमाले सर्वोच्च अदालतमा बन्दी प्रत्यक्षीकरणको रिट दायर गरेकी थिइन्। सोही रिटको सुनुवाइ गर्दै सर्वोच्चले यसअघि नै उनलाई रिहा गर्न आदेश दिएको थियो । आदेशअनुसार उनी छुटिसकेका छन् ।

सर्वोच्चको आदेशअनुसार प्रसाईं रिहा भए पनि प्रहरीले उनलाई घर बाहिर निस्कन नदिएको पत्नी उमाको दाबी छ ।