सबल अर्थतन्त्रबिना लोकतन्त्र बलियो हुँदैन : शंकर पोखरेल

काठमाडौं । नेकपा एमालेका महासचिव शंकर पोखरेलले बलियो अर्थतन्त्रबिना नेपालको लोकतान्त्रिक व्यवस्था सबल र दिगो हुन नसक्ने बताएका छन् ।

सामाजिक सञ्जालमार्फत आफ्नो धारणा सार्वजनिक गर्दै पोखरेलले राज्यव्यवस्थाको जग नै अर्थतन्त्र भएकाले लोकतान्त्रिक तथा समाजवादउन्मुख राज्यव्यवस्था सुदृढ बनाउन आर्थिक विकासमा विशेष जोड दिनुपर्ने बताएका हुन् ।

Watch On

उनले नेपालका लोकतान्त्रिक दलहरूले लामो समयदेखि अर्थ–राजनीतिक प्रश्नमा पर्याप्त ध्यान दिन नसकेको टिप्पणी गरेका छन् ।

पोखरेलले पूर्वाधार र सूचना प्रविधिको विकाससँगै नागरिकको जीवनस्तर तथा उपभोगको चाहना बढे पनि नेपालको आर्थिक विकासले त्यसलाई पछ्याउन नसकेको बताएका छन् । उनका अनुसार वस्तु तथा सेवाको अधिकतम उपभोग गर्ने प्रवृत्तिले आर्थिक अभाव बढाउँदै लगेको छ ।

यही आर्थिक अभावका कारण समाजमा भ्रष्टाचार, अपराध, कालोबजारी र तस्करी मौलाएको तथा त्यसबाट ‘दलाल नोकरशाही पुँजीवाद’ले थप अवसर पाएको पोखरेलको दाबी छ ।

गुणस्तरीय शिक्षा, स्वास्थ्य र रोजगारीको अभावका कारण पैतृक सम्पत्तिको क्षय हुनुका साथै युवाको विदेश पलायनसमेत तीव्र बनेको उनले उल्लेख गरेका छन् ।

‘अबको बाटो’बारे उनले स्वाधीन र सबल अर्थतन्त्र निर्माणलाई प्राथमिकतामा राख्नुपर्ने बताएका छन् । गम्भीर आर्थिक तथा सामाजिक समस्याको समाधानका लागि अर्थ–राजनीतिमा जोड दिनुको विकल्प नरहेको उनको भनाइ छ ।

‘स्वाधीन र सबल अर्थतन्त्र’को अभावमा नेपालको संघीय लोकतान्त्रिक गणतन्त्र सबल र दिगो हुन नसक्ने पोखरेलले बताएका छन् ।