काठमाडौँमा सुरु भयो १८औँ संस्करणको नाडा अटो शो (तस्बिरहरू)

काठमाडौं  । काठमाडौंको प्रदर्शनीमार्गस्थित भृकुटीमण्डपमा १८औँ संस्करणको नाडा अटो शो २०२६ सुरु भएको छ । उपराष्ट्रपति रामसहायप्रसाद यादवले मंगलबार अटो शोको उद्घाटन गरेका हुन् ।

अटो शोमा पाँच दर्जनभन्दा बढी विश्वस्तरीय अटोमोबाइल ब्रान्डका प्यासेन्जर सवारीसाधन प्रदर्शनमा राखिएका छन् । कमर्सियल सेग्मेन्टअन्तर्गत ईभी माइक्रो, भ्यानदेखि ठूला व्यावसायिक सवारीसाधनसमेत प्रदर्शनीमा राखिएको छ ।

Watch On

हुन्डाई, टाटा, बीवाईडी, दिपल, लिपमोटर, बीएआईसी, होङ्छी, अवतार, एवान, चांगन, चेरी, जिली र स्काइवेललगायतका ब्रान्डका विभिन्न मोडल प्रदर्शनीमा छन् । यस्तै, रोयल इन्फिल्ड, यामाहा र होन्डालगायतका दुईपांग्रे सवारीसाधनका ब्रान्डको समेत सहभागिता रहेको छ ।

यसपटकको अटो शोमा नेपालमै बनेको सिप्रदी–यात्री नेपालको विद्युतीय सवारीसाधन ‘यात्री पी–२’ समेत प्रदर्शनमा राखिएको छ । अटोमोबाइल क्षेत्रका विभिन्न अटोकम्पोनेन्ट, टायर, लुब्रिकेन्ट, स्पेयर पार्ट्स तथा एसेसरिज कम्पनीहरूको पनि उल्लेख्य सहभागिता रहेको छ ।

नाडाका अनुसार प्रदर्शनीमा २०० भन्दा बढी स्टल रहेका छन् । बैंक तथा वित्तीय संस्थाका १० वटाभन्दा बढी स्टलसमेत अटो शोमा राखिएका छन् ।

आजदेखि सुरु भएको अटो शो भदौ १४ गतेसम्म सञ्चालन हुनेछ । प्रदर्शनी अवधिमा अटोमोबाइल क्षेत्रसँग सम्बन्धित नीतिगत बहस, लगानी, अटो बीमा, सडक पूर्वाधार, सरकारी नीति, नयाँ सवारीसाधनको बढ्दो आगमन तथा रोजगारीका विषयमा विभिन्न छलफल कार्यक्रम आयोजना गरिने नाडाले जनाएको छ ।

तस्बिर : सुर्यम्स उप्रेती/नेपाल फोटो लाइब्रेरी