सुरु भयो जनैपूर्णिमा मेलाको तयारी

काठमाडौं । आउँदो भदौ १२ गते साउन शुक्ल पूर्णिमाका अवसरमा ललितपुरको कुम्भेश्वर–बंगलामुखीमा लाग्ने जनैपूर्णिमा मेलाको व्यवस्थापन तयारी सुरु भएको छ।

Watch On

मेलाको व्यवस्थापनका लागि ललितपुर महानगरपालिका–११ ले तयारी अघि बढाएको वडाध्यक्ष अरुजु कुमार खड्गीले जानकारी दिए। उनका अनुसार अहिले मन्दिर परिसर आसपास सरसफाइ, रंगरोगन तथा मर्मतसम्भारका काम भइरहेका छन्।

जनैपूर्णिमाका दिन मेला भर्न आउने भक्तजनले मन्दिर परिसरमा रहेको कुण्डमा स्नान गर्ने भएकाले कुण्डमा पानी भर्ने कामसमेत भइरहेको वडाध्यक्ष खड्गीले बताए।

कुम्भेश्वर मन्दिर परिसरमा रहेको कुण्डमा भगवान् श्रीरामले बाण प्रहार गरी गोसाइँकुण्डको पानी प्रवाह गराएको किंवदन्ती रहेको छ। यही धार्मिक विश्वासका कारण जनैपूर्णिमाका दिन कुम्भेश्वरमा स्नान गर्न भक्तजनको ठूलो भीड लाग्ने गर्छ।

मेलालाई व्यवस्थित र सुरक्षित बनाउन नेपाल प्रहरी, सशस्त्र प्रहरी तथा स्काउट परिचालन गरिने वडाध्यक्ष खड्गीले जानकारी दिए। भक्तजनको आवागमनलाई सहज बनाउन गेट नम्बर १, २, ३ र ४ बाट छुट्टाछुट्टै लाइनको व्यवस्था गरिने उनले बताए।

सनातन हिन्दू तथा बौद्ध धर्मावलम्बीले कुम्भेश्वरलाई बज्रपाणी लोकेश्वरका रूपमा समेत पूजा गर्ने गर्छन्। हरेक वर्ष जनैपूर्णिमाका अवसरमा कुम्भेश्वरमा ठूलो मेला लाग्ने र देशका विभिन्न स्थानबाट भक्तजन आउने गरेका छन्।