सरकार गठन र सञ्चालनका लागि बागमतीमा यस्तो समझदारी

हेटौँडा। संविधानको सर्वोच्चता, लोकतान्त्रिक मूल्य–मान्यता, राजनीतिक स्थिरता, सुशासन र समृद्ध बागमती प्रदेश निर्माण गर्ने साझा उद्देश्यसहित बागमती प्रदेश सरकार गठन तथा सञ्चालनका लागि सत्ता साझेदार दलहरूबीच समझदारी भएको छ।

Watch On

नेपाल कम्युनिस्ट पार्टी, नेकपा (एमाले) र राष्ट्रिय प्रजातन्त्र पार्टी (राप्रपा) बीच प्रदेश सरकार गठन तथा सञ्चालनसम्बन्धी समझदारीपत्रमा सोमबार हस्ताक्षर भएको हो।

समझदारीपत्रमा नेपालको संविधानले अंगीकार गरेका मूल मान्यतालाई अवलम्बन गर्दै समृद्ध बागमती प्रदेश निर्माणमा साझा प्रतिबद्धता जनाइएको छ।

सरकार गठनका क्रममा सत्ता साझेदार दलहरूको दलीय हैसियतका आधारमा मन्त्रालय बाँडफाँट गर्ने र मन्त्रालयको संख्या साविक आठभन्दा नबढाउने सहमति भएको छ। प्रदेश सभाको रिक्त सभामुख पद नेकपाबाट निर्वाचित गर्ने समझदारीसमेत भएको छ।

प्रदेश सरकार सञ्चालनका लागि न्यूनतम साझा कार्यक्रम तयार गरी आगामी सात दिनभित्र सार्वजनिक गर्ने सहमति भएको छ। त्यसका लागि सात सदस्यीय समिति गठन गरिएको छ। समितिमा नेपाल कम्युनिस्ट पार्टीका तीन, एमालेका दुई र राप्रपाका दुई सदस्य छन्।

सरकार सञ्चालनका विषयमा आवश्यक सल्लाह, सुझाव र समन्वय गर्न सुरुमा नेपाल कम्युनिस्ट पार्टीको नेतृत्वमा सरकार सञ्चालन संयन्त्र गठन गर्ने समझदारी भएको छ।

मन्त्रिपरिषद्लाई महिला सहभागितासहित समावेशी बनाउने र मर्यादाक्रममा मुख्यमन्त्रीपछि नेपाल कम्युनिस्ट पार्टी र त्यसपछि राप्रपाको प्रतिनिधि रहने व्यवस्था गरिएको छ।

समझदारीपत्रमा राप्रपा संसदीय दलका नेता उद्धव थापा, एमाले संसदीय दलका नेता जगन्नाथ थपलिया, नेपाली कम्युनिस्ट पार्टी बागमती प्रदेशसभा दलका नेता शालिकराम जम्कट्टेल र बागमती प्रदेशका मुख्यमन्त्री किरण थापा मगरले हस्ताक्षर गरेका छन्।